പാലക്കാട്: വിഷു ആഘോഷങ്ങൾക്കിടെ കൈയിലിരുന്ന പടക്കം പൊട്ടിത്തെറിച്ച് യുവാവ് മരിച്ചു (Firecracker Accident Kerala). പാലക്കാട് ശ്രീകൃഷ്ണപുരം രാഗം കോർണറിലെ വെള്ളപ്പാംതൊടി സ്വദേശി ദിലീപ് (34) ആണ് മരിച്ചത്. ബുധനാഴ്ച രാത്രി എട്ടരയോടെ പ്രദേശത്തെ ക്ലബ്ബ് അംഗങ്ങൾക്കൊപ്പം പടക്കം പൊട്ടിക്കുന്നതിനിടെയായിരുന്നു അപകടം. ക്ലബ്ബ് അംഗങ്ങൾക്കൊപ്പം പടക്കം പൊട്ടിച്ചുകൊണ്ടിരുന്ന ദിലീപിന്റെ കൈയിൽ ഒന്നിലധികം ഗുണ്ടുകൾ ഉണ്ടായിരുന്നു. പടക്കത്തിന് തീ കൊളുത്തുന്നതിനിടെ കൈയിൽ കരുതിയിരുന്ന മറ്റ് ഗുണ്ടുകളിലേക്കും തീ പടരുകയും അവ ഒന്നിച്ച് പൊട്ടിത്തെറിക്കുകയുമായിരുന്നു. സ്ഫോടനത്തിന്റെ ആഘാതത്തിൽ ദിലീപിന് ഗുരുതരമായി പൊള്ളലേറ്റു.
ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സ്ഫോടനത്തെത്തുടർന്നുണ്ടായ ആഘാതത്തിൽ ഹൃദയാഘാതം സംഭവിച്ചതാണ് മരണകാരണമെന്നാണ് പ്രാഥമിക പോസ്റ്റ്മോർട്ടം റിപ്പോർട്ടിൽ പറയുന്നത്.മൃതദേഹം പോസ്റ്റ്മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുകൊടുത്തു. ശ്രീകൃഷ്ണപുരം പോലീസ് സംഭവത്തിൽ കേസെടുത്ത് അന്വേഷണം ആരംഭിച്ചു. ആഘോഷങ്ങൾക്കിടെ ഉണ്ടായ ഈ ദുരന്തം നാടിനെ ഒന്നടങ്കം കണ്ണീരിലാഴ്ത്തി.
Story Summary: A 34-year-old man named Dileep died in Sreekrishnapuram, Palakkad, during Vishu celebrations after fireworks exploded in his hand. Preliminary reports suggest he suffered a fatal heart attack due to the impact of the blast.
