Follow on Google News
നാഗ്പുർ: ബോളിവുഡ് താരം രൺവീർ സിങ് നാഗ്പുരിലെ ആർഎസ്എസ് ആസ്ഥാനം സന്ദർശിച്ച് ആർഎസ്എസ് മേധാവി മോഹൻ ഭാഗവതുമായി കൂടിക്കാഴ്ച നടത്തി (Ranveer Singh RSS Visit Nagpur). രൺവീർ നായകനായ ‘ധുരന്ധർ 2’ എന്ന ചിത്രം തിയേറ്ററുകളിൽ വൻ വിജയം നേടുന്നതിനിടെയാണ് ഈ സന്ദർശനം. ചിത്രം ഒരു പ്രൊപ്പഗണ്ട സിനിമയാണെന്ന വിമർശനം ശക്തമായി നിലനിൽക്കുന്ന സാഹചര്യത്തിൽ ഈ കൂടിക്കാഴ്ചയ്ക്ക് വലിയ രാഷ്ട്രീയ പ്രാധാന്യമാണ് കൈവന്നിരിക്കുന്നത്.
വെള്ളിയാഴ്ച വൈകുന്നേരം നാഗ്പുരിലെത്തിയ താരം ഒന്നരമണിക്കൂറോളം ആർഎസ്എസ് ആസ്ഥാനത്ത് ചെലവഴിച്ചു. ചിത്രത്തിന്റെ വിജയത്തെക്കുറിച്ചും പ്രമേയത്തെക്കുറിച്ചും അദ്ദേഹം മോഹൻ ഭാഗവതുമായി ചർച്ച ചെയ്തതായാണ് വിവരം. തുടർന്ന് രേഷ്മിബാഗിലെ ഹെഡ്ഗേവാർ സ്മൃതി മന്ദിർ സന്ദർശിച്ച രൺവീർ, ആർഎസ്എസ് സ്ഥാപകൻ ഡോ. കെ.ബി. ഹെഡ്ഗേവാറിനും എം.എസ്. ഗോൾവാൾക്കറിനും ആദരാഞ്ജലികൾ അർപ്പിച്ചു. അവിടെയുണ്ടായിരുന്ന ആർഎസ്എസ് പ്രവർത്തകരുമായും അദ്ദേഹം സംവദിച്ചു.
രൺവീർ സിങ്ങിന്റെ കരിയറിലെ ഏറ്റവും വലിയ വിജയങ്ങളിലൊന്നായി മാറിയിരിക്കുകയാണ് ‘ധുരന്ധർ: ദി റിവഞ്ച്’. ആഗോളതലത്തിൽ 1600 കോടി രൂപയിലേറെയാണ് ചിത്രം ഇതുവരെ നേടിയത്. എന്നാൽ സിനിമയുടെ രാഷ്ട്രീയ നിലപാടുകളെച്ചൊല്ലി സോഷ്യൽ മീഡിയയിൽ ഉൾപ്പെടെ വലിയ തർക്കങ്ങൾ നടക്കുന്നുണ്ട്. സന്ദർശനത്തെക്കുറിച്ച് രൺവീറോ ആർഎസ്എസ് നേതൃത്വമോ ഔദ്യോഗികമായി പ്രതികരിച്ചിട്ടില്ല.
Summary: Bollywood actor Ranveer Singh visited the RSS headquarters in Nagpur and met with Sarsanghchalak Mohan Bhagwat amid ongoing “propaganda” allegations against his latest blockbuster, Dhurandhar 2. The film has already grossed over ₹1600 crore globally. Ranveer spent around 90 minutes at the headquarters and also visited the Hedgewar Smriti Mandir to pay tributes to RSS founders Dr. K.B. Hedgewar and M.S. Golwalkar.
