മീററ്റ്: വിവാഹമോചനം പലപ്പോഴും കുടുംബങ്ങളിൽ ഒരു തീരാവേദനയോ നാണക്കേടോ ആയി കാണുന്ന കാലത്ത്, മകളുടെ മോചനത്തെ ആഘോഷമാക്കി മാറ്റി മാതൃകയാവുകയാണ് ഉത്തർപ്രദേശിലെ മീററ്റിലുള്ള ഒരു കുടുംബം (Father Celebrates Daughter Divorce). വിരമിച്ച ജഡ്ജി കൂടിയായ ഡോ. ജ്ഞാനേന്ദ്ര ശർമ്മയാണ് തന്റെ ഏകമകൾ പ്രനീതയുടെ വിവാഹമോചന വാർത്ത മേളവും മധുരപലഹാരങ്ങളുമായി മീററ്റ് കുടുംബ കോടതിക്ക് മുന്നിൽ ആഘോഷിച്ചത്. ഇതിന്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
പ്രനീതയുടെ ചിത്രം പതിപ്പിച്ച കറുത്ത ടീഷർട്ടുകൾ ധരിച്ചാണ് കുടുംബാംഗങ്ങൾ ആഘോഷത്തിൽ പങ്കെടുത്തത്. “എന്റെ മകളെ ഞാൻ സ്നേഹിക്കുന്നു. അവളാണെന്റെ ഹൃദയവും ആത്മാവും” എന്ന വാചകമാണ് ടീഷർട്ടിൽ ഉണ്ടായിരുന്നത്. പ്രനീത ധരിച്ച ടീഷർട്ടിൽ “എന്റെ കുടുംബമാണ് എന്റെ ജീവിതം” എന്നും എഴുതിയിരുന്നു. മകൾ ജനിച്ചപ്പോൾ ആഘോഷിച്ചതുപോലെ തന്നെ, അവളുടെ ജീവിതത്തിലെ ഓരോ ഘട്ടത്തിലും അവൾക്ക് തങ്ങൾ ഒപ്പമുണ്ടെന്ന് കാണിക്കാനാണ് ഈ ആഘോഷമെന്ന് ഡോ. ജ്ഞാനേന്ദ്ര ശർമ്മ പറഞ്ഞു.
2018-ലാണ് ഇന്ത്യൻ സൈന്യത്തിൽ മേജറായ ഗൗരവ് അഗ്നിഹോത്രിയുമായി പ്രനീതയുടെ വിവാഹം കഴിഞ്ഞത്. ഇവർക്ക് ഒരു മകനുണ്ട്. എന്നാൽ വിവാഹത്തിന് പിന്നാലെ ഭർതൃവീട്ടിൽ നിന്ന് കടുത്ത പീഡനങ്ങളാണ് പ്രനീത നേരിട്ടത്. 2021-ൽ തന്നെ വിവാഹമോചന നടപടികൾ ആരംഭിച്ചിരുന്നു. കുടുംബം തകരാതിരിക്കാൻ താൻ പരമാവധി ശ്രമിച്ചുവെന്നും എന്നാൽ സാഹചര്യം മോശമായപ്പോൾ പിതാവ് നൽകിയ പിന്തുണയാണ് തന്നെ മുന്നോട്ട് നയിച്ചതെന്നും പ്രനീത പറഞ്ഞു.
2022-ൽ ഒരു റോഡപകടത്തിൽ പ്രനീതയുടെ സഹോദരൻ മരിച്ചത് ആ കുടുംബത്തെ തളർത്തിയിരുന്നു. അപ്പോഴും ഭർതൃവീട്ടിലെ പീഡനം തുടർന്നതോടെയാണ് വിവാഹമോചനമെന്ന ഉറച്ച തീരുമാനത്തിലേക്ക് പ്രനീത എത്തിയത്. കോടതി വിധി വന്നതിന് പിന്നാലെ മകളെ പൂമാലയിട്ട് സ്വീകരിച്ച കുടുംബം കോടതിക്ക് മുന്നിൽ തന്നെ ലഡു വിതരണം ചെയ്യുകയും ചെണ്ടമേളത്തിനൊപ്പം നൃത്തം ചെയ്യുകയും ചെയ്തു. വിഷമഘട്ടങ്ങളിൽ മക്കളെ ചേർത്തുപിടിക്കുന്ന ഇത്തരം കുടുംബങ്ങളെയാണ് സമൂഹത്തിന് ആവശ്യമെന്ന പ്രതികരണങ്ങളാണ് വീഡിയോയ്ക്ക് താഴെ വരുന്നത്.
Vineeta got married in 2018. The marriage soon turned bitter and didn’t last long. After 7 years, divorce was formalized recently and Vineeta’s parents celebrated it with Dhol, dance and sweets in the court premises in Meerut, Uttar Pradesh. Attendees were seen wearing T-shirts… pic.twitter.com/L4JAVH4jxx
— Piyush Rai (@Benarasiyaa) April 5, 2026
