കോഴിക്കോട്: കുടകിലെ തടിയൻ്റമോൾ മലനിരകളിൽ ട്രക്കിങ്ങിനിടെ കാണാതായ മലയാളി യുവതി ശരണ്യ സുരക്ഷിതയായി നാട്ടിലെത്തി. മൂന്ന് പകലും രണ്ട് രാത്രിയും നീണ്ട ആശങ്കകൾക്കൊടുവിൽ നാദാപുരം ഇയ്യങ്കോട്ടെ വീട്ടിൽ മാതാപിതാക്കൾക്കൊപ്പം ചേർന്നപ്പോൾ അത് വലിയൊരു അതിജീവനത്തിന്റെ കഥയായി മാറി. തന്നെ കണ്ടെത്താൻ പ്രയത്നിച്ച രക്ഷാപ്രവർത്തകർക്കും പ്രാർത്ഥിച്ചവർക്കും ശരണ്യ നന്ദി രേഖപ്പെടുത്തി.(4 days of survival, Saranya reaches home in Nadapuram)
വഴിതെറ്റിയെന്ന് തിരിച്ചറിഞ്ഞ നിമിഷം തിരികെ കയറാൻ ശ്രമിക്കാത്തത് വലിയ അബദ്ധമായെന്ന് ശരണ്യ ഓർക്കുന്നു. കാട്ടിലെ പ്രതികൂല സാഹചര്യങ്ങളെ ശരണ്യ നേരിട്ടു. അരുവിയിൽ നിന്നുള്ള വെള്ളം കുടിച്ചാണ് ദാഹം തീർത്തത്. വന്യമൃഗങ്ങളുടെ ശബ്ദവും സാന്നിധ്യവും ഭയപ്പെടുത്തിയെങ്കിലും ആത്മവിശ്വാസം കൈവിടാതെ പിടിച്ചുനിന്നു.
ഈ അനുഭവം തന്റെ ട്രക്കിങ് താൽപ്പര്യത്തെ ബാധിച്ചിട്ടില്ലെന്നും വേനൽച്ചൂട് കുറഞ്ഞാൽ പുതിയ യാത്രകൾ ആരംഭിക്കുമെന്നും ശരണ്യ വ്യക്തമാക്കി. കൊച്ചിയിലെ ഐടി കമ്പനി ഉദ്യോഗസ്ഥയായ ശരണ്യ കഴിഞ്ഞ വ്യാഴാഴ്ചയാണ് കുടകിലെ മടിക്കേരി താലൂക്കിലെ ഏറ്റവും ഉയരം കൂടിയ കൊടുമുടിയായ തടിയൻ്റമോളിൽ എത്തിയത്. ഓൺലൈൻ ടിക്കറ്റെടുത്ത് രാവിലെ 8:15-ഓടെ വനംവകുപ്പിന്റെ അനുമതിയോടെ മല കയറി. മറ്റ് സംഘങ്ങൾക്കൊപ്പമാണ് ശരണ്യയെ വിട്ടത്.
