കുവൈത്ത് സിറ്റി: രാജ്യത്തെ പ്രധാന എണ്ണ ഉൽപ്പാദന കേന്ദ്രങ്ങൾ ലക്ഷ്യമിട്ട് ഡ്രോൺ ആക്രമണം (Kuwait Oil Facility Drone Attack). കുവൈത്ത് പെട്രോളിയം കോർപ്പറേഷന്റെ (KPC) കീഴിലുള്ള വിവിധ പ്രവർത്തന കേന്ദ്രങ്ങളിലാണ് ആക്രമണമുണ്ടായതിനെത്തുടർന്ന് തീപിടിത്തവും നാശനഷ്ടങ്ങളും സംഭവിച്ചത്. കുവൈത്ത് നാഷണൽ പെട്രോളിയം കമ്പനി (KNPC), പെട്രോകെമിക്കൽ ഇൻഡസ്ട്രീസ് കമ്പനി (PIC) എന്നിവയുടെ കേന്ദ്രങ്ങളിലാണ് അക്രമികൾ നാശനഷ്ടങ്ങൾ വരുത്തിയത്.
ഡ്രോൺ ആക്രമണത്തിൽ എണ്ണ ശുദ്ധീകരണ ശാലകളിലും അനുബന്ധ കേന്ദ്രങ്ങളിലും തീപിടിത്തമുണ്ടായെങ്കിലും അടിയന്തര സുരക്ഷാ സംവിധാനങ്ങൾ പ്രവർത്തിച്ചതിനാൽ വലിയൊരു ദുരന്തം ഒഴിവായി. മുൻകൂട്ടി നിശ്ചയിച്ച അടിയന്തര പ്രവർത്തന പദ്ധതികൾ (Emergency Plan) ഉടനടി നടപ്പിലാക്കിയതായി അധികൃതർ അറിയിച്ചു. ഇതോടെ തീ നിയന്ത്രണവിധേയമാക്കാനും സമീപത്തുള്ള മറ്റ് കേന്ദ്രങ്ങളിലേക്ക് പടരുന്നത് തടയാനും സാധിച്ചു. ആക്രമണത്തിൽ ആർക്കും പരിക്കേൽക്കുകയോ ജീവഹാനി സംഭവിക്കുകയോ ചെയ്തിട്ടില്ലെന്ന് കുവൈത്ത് പെട്രോളിയം കോർപ്പറേഷൻ സ്ഥിരീകരിച്ചു.
ജീവനക്കാരുടെ സുരക്ഷ ഉറപ്പാക്കുന്നതിനായി എല്ലാ മുൻകരുതലുകളും സ്വീകരിച്ചിട്ടുണ്ടെന്ന് അധികൃതർ വ്യക്തമാക്കി. ആക്രമണത്തിന്റെ വ്യാപ്തിയും സാമ്പത്തിക നാശനഷ്ടങ്ങളും വിലയിരുത്തുന്നതിനായി ബന്ധപ്പെട്ട സുരക്ഷാ ഏജൻസികളുമായി ചേർന്ന് പരിശോധന തുടരുകയാണ്. എണ്ണ കേന്ദ്രങ്ങളുടെ സുരക്ഷാ-സംരക്ഷണ മാനദണ്ഡങ്ങളിൽ യാതൊരു വിട്ടുവീഴ്ചയും അനുവദിക്കില്ലെന്ന് കോർപ്പറേഷൻ ആവർത്തിച്ചു.
രാജ്യാന്തര വിപണിയിൽ നിർണ്ണായകമായ കുവൈത്തിലെ എണ്ണ കേന്ദ്രങ്ങൾക്ക് നേരെയുണ്ടായ ഈ നീക്കം ഗൗരവത്തോടെയാണ് രാജ്യം കാണുന്നത്. സംഭവത്തിൽ വിശദമായ അന്വേഷണത്തിന് കുവൈത്ത് സർക്കാർ ഉത്തരവിട്ടിട്ടുണ്ട്.
Story Summary:
Drone attacks targeted key oil installations in Kuwait, causing fires and structural damage at Kuwait National Petroleum Company and Petrochemical Industries Company facilities. Kuwait Petroleum Corporation confirmed that emergency protocols were activated, containing the blaze and preventing further spread. No casualties were reported, and authorities are currently assessing the extent of the damage while reinforcing security measures at all energy sites.
