ടെഹ്റാൻ: അമേരിക്കയുടെ രണ്ട് യുദ്ധവിമാനങ്ങൾ വെടിവെച്ചിട്ടതായി ഇറാൻ സൈന്യം. രാജ്യത്തിന്റെ തെക്കുപടിഞ്ഞാറൻ മേഖലയിൽ വെച്ച് ഒരു എഫ്-15 (F-15) വിമാനവും, ഹോർമുസ് കടലിടുക്കിന് സമീപം എ-10 (A-10) വിമാനവുമാണ് തകർത്തതെന്ന് ഇറാൻ അവകാശപ്പെട്ടു.(Iran says it shot down two US jets, Search underway for pilot )
ഇറാൻ സൈന്യത്തിന്റെ ഖാതം അൽ-അൻബിയ സെൻട്രൽ ഹെഡ്ക്വാർട്ടേഴ്സ് വക്താവാണ് വെള്ളിയാഴ്ച ഇക്കാര്യം സ്ഥിരീകരിച്ചത്. തകർന്ന എ-10 വിമാനം പേർഷ്യൻ ഗൾഫിലാണ് പതിച്ചതെന്ന് ഇറാൻ വ്യക്തമാക്കി. തകർന്ന എ-10 വിമാനത്തിലെ പൈലറ്റ് സുരക്ഷിതനാണെന്ന് റിപ്പോർട്ട് ചെയ്തു. എന്നാൽ എഫ്-15 വിമാനത്തിലുണ്ടായിരുന്ന ഒരു പൈലറ്റിന്റെ കാര്യത്തിൽ ഇപ്പോഴും അനിശ്ചിതത്വം തുടരുകയാണ്.
വിമാനത്തിലുണ്ടായിരുന്ന ഒരു ജീവനക്കാരനെ അമേരിക്കൻ സേന രക്ഷപ്പെടുത്തിയെങ്കിലും രണ്ടാമത്തെ ആൾക്കായി തിരച്ചിൽ തുടരുകയാണെന്ന് യുഎസ് മാധ്യമങ്ങൾ റിപ്പോർട്ട് ചെയ്യുന്നു. തകർന്ന വിമാനത്തിന്റെ അവശിഷ്ടങ്ങളുടെയും പാരച്യൂട്ട് ഘടിപ്പിച്ച ഇജക്ഷൻ സീറ്റിന്റെയും ചിത്രങ്ങൾ ഇറാൻ ഔദ്യോഗിക മാധ്യമങ്ങൾ പുറത്തുവിട്ടു.
വിമാനം തകർന്ന സംഭവം ഇറാനുമായുള്ള ചർച്ചകളെ ബാധിക്കില്ലെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രതികരിച്ചു. “ഒരിക്കലുമില്ല. ഇതൊരു യുദ്ധമാണ്, നമ്മൾ യുദ്ധത്തിലാണ്,” എന്നാണ് അഭിമുഖത്തിൽ ട്രംപ് പറഞ്ഞത്. വിമാനം തകർന്നതിന് പിന്നാലെ ട്രംപിനെ പരിഹസിച്ച് ഇറാൻ പാർലമെന്റ് സ്പീക്കർ മുഹമ്മദ് ബാഗർ ഘാലിബാഫ് രംഗത്തെത്തി.
“ഇറാനെ 37 തവണ തോൽപ്പിച്ചു എന്ന് അവകാശപ്പെടുന്നവരുടെ തന്ത്രമില്ലാത്ത യുദ്ധം ഇപ്പോൾ ‘ഭരണകൂട മാറ്റത്തിൽ’ നിന്നും ‘ഞങ്ങളുടെ പൈലറ്റുമാരെ ആരെങ്കിലും ഒന്ന് കണ്ടെത്തിത്തരുമോ, പ്ലീസ്?’ എന്ന നിലയിലേക്ക് തരംതാണിരിക്കുന്നു,” എന്ന് അദ്ദേഹം സോഷ്യൽ മീഡിയയിൽ കുറിച്ചു. സംഭവത്തെക്കുറിച്ച് പെന്റഗണോ മിഡിൽ ഈസ്റ്റിലെ സൈനിക നീക്കങ്ങൾക്ക് നേതൃത്വം നൽകുന്ന യുഎസ് സെൻട്രൽ കമാൻഡോ ഇതുവരെ ഔദ്യോഗികമായി പ്രതികരിച്ചിട്ടില്ല.
