ന്യൂഡൽഹി: രാജ്യത്ത് ബിസിനസ്സ് നടത്തുന്നതും ജീവിതസാഹചര്യങ്ങളും കൂടുതൽ ലളിതമാക്കുന്നതിന്റ ഭാഗമായി, നിസ്സാരമായ നിയമലംഘനങ്ങളെ ക്രിമിനൽ കുറ്റമല്ലാതാക്കുന്ന നിർണ്ണായക ബിൽ ലോക്സഭ പാസാക്കി. ‘ജൻ വിശ്വാസ് നിയമ ഭേദഗതി ബിൽ, 2026’ ശബ്ദവോട്ടോടെയാണ് സഭ അംഗീകരിച്ചത്.(Lok Sabha passes Jan Vishwas Amendment Bill, Over 700 legal provisions will be decriminalized)
23 മന്ത്രാലയങ്ങൾക്ക് കീഴിലുള്ള 79 കേന്ദ്ര നിയമങ്ങളിലെ 784 വ്യവസ്ഥകളിലാണ് ഭേദഗതി നിർദ്ദേശിച്ചിരിക്കുന്നത്. ചെറിയ വീഴ്ചകളുടെ പേരിൽ ജയിൽ ശിക്ഷ ഉൾപ്പെടെയുള്ള 717 നിയമ വ്യവസ്ഥകൾ ക്രിമിനൽ കുറ്റമല്ലാതാക്കി മാറ്റും. പകരം പിഴയോ മറ്റ് ശിക്ഷകളോ മാത്രമായിരിക്കും നൽകുക.
ആയിരത്തിലധികം കുറ്റകൃത്യങ്ങളെ യുക്തിസഹമായി പുനർനിർണ്ണയിക്കാനും കാലഹരണപ്പെട്ടതും അനാവശ്യവുമായ നിയമങ്ങൾ നീക്കം ചെയ്യാനും ബിൽ ലക്ഷ്യമിടുന്നു. ഇത് രാജ്യത്തെ നിയന്ത്രണ സംവിധാനങ്ങളെ കൂടുതൽ മെച്ചപ്പെടുത്തും. ബില്ലിന്മേലുള്ള ചർച്ചയ്ക്ക് മറുപടി നൽകിയ കേന്ദ്ര വാണിജ്യ വ്യവസായ മന്ത്രി പിയൂഷ് ഗോയൽ, ഈ നിയമം സാധാരണക്കാർക്കും ചെറുകിട-ഇടത്തരം സംരംഭകർക്കും വലിയ ആശ്വാസമാകുമെന്ന് വ്യക്തമാക്കി.
ചെറിയ സാങ്കേതിക പിഴവുകളുടെ പേരിൽ കോടതികളും പോലീസ് സ്റ്റേഷനുകളും കയറിയിറങ്ങേണ്ട സാഹചര്യം ഇല്ലാതാകുന്നതോടെ നിക്ഷേപകർക്ക് കൂടുതൽ ആത്മവിശ്വാസത്തോടെ പ്രവർത്തിക്കാൻ സാധിക്കുമെന്നും അദ്ദേഹം കൂട്ടിച്ചേർത്തു. നിയമവ്യവസ്ഥയിലെ സങ്കീർണ്ണതകൾ കുറയ്ക്കുന്നതിലൂടെ അഴിമതി തടയാനും ഭരണനിർവ്വഹണം സുതാര്യമാക്കാനും ഈ ഭേദഗതികൾ സഹായിക്കുമെന്നാണ് കേന്ദ്ര സർക്കാരിന്റെ വിലയിരുത്തൽ.
