വാഷിങ്ടൺ: ഇറാനെതിരെ അതിരൂക്ഷമായ ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. അമേരിക്ക മുന്നോട്ടുവെക്കുന്ന നിബന്ധനകൾ അംഗീകരിച്ച് കരാറിലെത്താൻ ഇറാൻ തയ്യാറായില്ലെങ്കിൽ രാജ്യത്തെ ‘ശിലായുഗത്തിലേക്ക്’ തള്ളിക്കളയുന്ന രീതിയിലുള്ള സൈനിക നടപടി ഉണ്ടാകുമെന്ന് ട്രംപ് മുന്നറിയിപ്പ് നൽകി.( Iran Will Be Taken ‘Back To Stone Age’ If No Deal Reached, Trump’s ultimatum to destroy power plants)
ഇറാന്റെ മുഴുവൻ വൈദ്യുതി ഉൽപ്പാദന നിലയങ്ങളെയും ഒരേസമയം ആക്രമിച്ച് തകർക്കുമെന്നാണ് ട്രംപിന്റെ ഭീഷണി. വരും ആഴ്ചകളിൽ ഉടമ്പടി ഉണ്ടായില്ലെങ്കിൽ ഇറാന്റെ നിലനിൽപ്പിനെത്തന്നെ ബാധിക്കുന്ന രീതിയിൽ ഗ്രിഡുകൾ തകർക്കും. ഇറാന്റെ എണ്ണ ഉൽപ്പാദന കേന്ദ്രങ്ങൾ തകർക്കുന്നത് എളുപ്പമാണെങ്കിലും ഇതുവരെ അവയെ സ്പർശിച്ചിട്ടില്ല. എന്നാൽ വഴങ്ങിയില്ലെങ്കിൽ ഈ കേന്ദ്രങ്ങളും ആക്രമിക്കപ്പെടുമെന്ന് അദ്ദേഹം സൂചിപ്പിച്ചു.
കഴിഞ്ഞ പത്ത് ദിവസത്തിനുള്ളിൽ ഇറാന്റെ നാവികസേനാ ശേഷി പൂർണ്ണമായും തകർത്തുവെന്നും വ്യോമസേനയെ നിഷ്ക്രിയമാക്കിയെന്നും ട്രംപ് അവകാശപ്പെട്ടു. മിസൈൽ വിക്ഷേപണ കേന്ദ്രങ്ങളും പ്രതിരോധ ഫാക്ടറികളും ഭൂരിഭാഗവും നശിപ്പിക്കപ്പെട്ടു. ഇറാനെ ആണവായുധങ്ങളുടെ കാര്യത്തിൽ ഒരിക്കലും വിശ്വസിക്കാനാവില്ലെന്നും തങ്ങളുടെ ലക്ഷ്യങ്ങൾ കൈവരിക്കുന്നതിനോട് അമേരിക്ക വളരെ അടുത്തെത്തിയെന്നും അദ്ദേഹം കൂട്ടിച്ചേർത്തു.
യുദ്ധത്തെത്തുടർന്ന് അമേരിക്കയിൽ ഗ്യാസോലിൻ വിലയിലുണ്ടായ വർധനവ് താൽക്കാലിക പ്രതിഭാസം മാത്രമാണെന്ന് ട്രംപ് നിരീക്ഷിച്ചു. ബാക്കിയുള്ള സൈനിക നടപടികൾ കൂടി വേഗത്തിൽ പൂർത്തിയാക്കി ഇറാനെ പൂർണ്ണമായും വരുതിയിലാക്കുമെന്നാണ് വൈറ്റ് ഹൗസിന്റെ നിലപാട്. ഇറാൻ പ്രസിഡന്റ് മസൂദ് പെസഷ്കിയാൻ സമാധാനപരമായ ചർച്ചകൾക്ക് ആഹ്വാനം ചെയ്ത് കത്തയച്ചതിന് പിന്നാലെയാണ് ട്രംപിന്റെ ഈ ‘അന്ത്യശാസനം’ എന്നത് ശ്രദ്ധേയമാണ്.
