കണ്ണൂർ: കേരളത്തിൽ ആദ്യമായി ബിജെപിയും ഇടതുപക്ഷവും തമ്മിൽ അവിശുദ്ധ സഖ്യമുണ്ടാക്കിയിരിക്കുകയാണെന്ന് ലോക്സഭാ പ്രതിപക്ഷ നേതാവ് രാഹുൽ ഗാന്ധി (Rahul Gandhi). യഥാർത്ഥ ഇടതുപക്ഷക്കാർ ഇന്ന് യുഡിഎഫിനൊപ്പമാണ് നിൽക്കേണ്ടതെന്നും സിപിഎം ഇപ്പോൾ വെറുമൊരു കോർപ്പറേറ്റ് പാർട്ടിയായി മാറിയെന്നും അദ്ദേഹം കണ്ണൂരിൽ നടന്ന തിരഞ്ഞെടുപ്പ് പ്രചാരണ വേദിയിൽ കുറ്റപ്പെടുത്തി.
മുഖ്യമന്ത്രി പിണറായി വിജയനും പ്രധാനമന്ത്രി നരേന്ദ്ര മോദിയും തമ്മിൽ പരസ്പര സഹായ കരാറാണുള്ളതെന്ന് രാഹുൽ ആരോപിച്ചു. ട്രംപ് മോദിയെ നിയന്ത്രിക്കുന്നത് പോലെയാണ് മോദി പിണറായിയെ നിയന്ത്രിക്കുന്നത്. മുഖ്യമന്ത്രിക്കും കുടുംബത്തിനും എതിരായ കേസുകളിൽ കേന്ദ്രം അനുകൂല നിലപാട് സ്വീകരിക്കുന്നത് ഇതിന് തെളിവാണ്. മോദി പിണറായിയെയും, പിണറായി മോദിയെയും വിമർശിക്കാൻ ഭയപ്പെടുകയാണെന്നും അദ്ദേഹം പരിഹസിച്ചു.
ആർഎസ്എസിനെ എതിർക്കുന്നവരെ അടിച്ചമർത്താനാണ് മുഖ്യമന്ത്രി ശ്രമിക്കുന്നത്. പ്രധാനമന്ത്രി കേരളത്തിൽ വരുമ്പോൾ ശബരിമല സ്വർണ്ണ മോഷണമടക്കമുള്ള അഴിമതികളെക്കുറിച്ച് മൗനം പാലിക്കുന്നത് സിപിഎമ്മിനെ സഹായിക്കാനാണ്. അമേരിക്കയുമായി മോദി സർക്കാർ ഉണ്ടാക്കിയ കരാറുകൾ ഇന്ത്യൻ കാർഷിക മേഖലയെ തകർത്തു. റബ്ബർ കർഷകരടക്കം വലിയ പ്രതിസന്ധിയിലാണ്.
ഇടതുഭരണം കേരളത്തിൽ വലിയ തോതിലുള്ള തൊഴിലില്ലായ്മയാണ് സൃഷ്ടിച്ചത്. ഇതിന് പരിഹാരം കാണാൻ യുഡിഎഫിന് മാത്രമേ സാധിക്കൂ. വെറുപ്പിനെയല്ല സ്നേഹത്തെയാണ് കേരളം തിരഞ്ഞെടുക്കുകയെന്നും ശ്രീനാരായണ ഗുരു പകർന്നുനൽകിയ ഐക്യത്തിന്റെ സന്ദേശമാണ് യുഡിഎഫ് മുന്നോട്ടുവെക്കുന്നതെന്നും രാഹുൽ പറഞ്ഞു.
ബിജെപിയെയും സിപിഎമ്മിനെയും ഒരുപോലെ നിയന്ത്രിക്കാൻ ബിജെപിക്ക് സാധിക്കുമെങ്കിലും കോൺഗ്രസിനെ അവർക്ക് ഭയമാണെന്നും രാഹുൽ ഗാന്ധി കൂട്ടിച്ചേർത്തു.
Story Summary:
Leader of the Opposition Rahul Gandhi, during his campaign in Kannur, alleged a secret alliance between the CPM and BJP in Kerala. He claimed that PM Modi protects CM Pinarayi Vijayan from legal cases and controls him, similar to how Trump once influenced Modi. Rahul criticized the CPM for becoming a “corporate party” and urged voters to support the UDF for the state’s welfare.
