സംസ്ഥാനത്തെ സ്കൂളുകളിൽ കുട്ടികളുടെ സുരക്ഷ ഉറപ്പാക്കുന്നതിനായി ആരോഗ്യ-കുടുംബക്ഷേമ വകുപ്പ് പുതിയ മാർഗനിർദേശങ്ങൾ പുറപ്പെടുവിച്ചു (Kerala School Safety Guidelines). സ്കൂൾ കെട്ടിടങ്ങൾക്ക് ഫിറ്റ്നസ് സർട്ടിഫിക്കറ്റ് ലഭിക്കണമെങ്കിൽ ഇനി ആറ് വിവിധ വകുപ്പുകളുടെ പരിശോധനയും അംഗീകാരവും നിർബന്ധമാണ്. പൊതുവിദ്യാഭ്യാസ വകുപ്പിന് കീഴിലുള്ള സ്കൂളുകൾക്ക് പുറമെ സി.ബി.എസ്.ഇ, ഐ.സി.എസ്.ഇ സ്കൂളുകൾക്കും അങ്കണവാടികൾക്കും ഈ നിർദേശങ്ങൾ ബാധകമാണ്.
പാമ്പുകളെ അകറ്റാൻ സ്വീകരിക്കേണ്ട നടപടികൾ
സ്കൂൾ പരിസരങ്ങളിൽ പാമ്പ് ശല്യം ഒഴിവാക്കാൻ കർശനമായ ശുചിത്വ പരിപാടികൾ നടപ്പിലാക്കണം:
- പരിസര ശുചിത്വം: സ്കൂൾ പരിസരത്തെ കുറ്റിക്കാടുകളും പുല്ലും കൃത്യമായ ഇടവേളകളിൽ വെട്ടിത്തെളിക്കണം. ഭക്ഷണാവശിഷ്ടങ്ങളും മാലിന്യങ്ങളും കുന്നുകൂടാൻ അനുവദിക്കരുത്.
- കെട്ടിട പരിപാലനം: കെട്ടിടത്തിലെ വിടവുകളും പൊത്തുകളും സിമന്റ് ഉപയോഗിച്ച് അടയ്ക്കണം. ക്ലാസ് മുറികൾക്ക് സമീപം തടിക്കഷണങ്ങളോ നിർമാണ വസ്തുക്കളോ സൂക്ഷിക്കരുത്.
- ബാഗും ഷൂസും: കുട്ടികളുടെ ബാഗുകളും ഷൂസും ക്ലാസ് മുറികൾക്ക് പുറത്ത് സൂക്ഷിക്കുന്നത് ഒഴിവാക്കണം. പ്രവൃത്തി സമയത്തിന് ശേഷം ജനാലകളും കതകുകളും കൃത്യമായി അടച്ചിടണം.
അടിയന്തര സാഹചര്യങ്ങൾ നേരിടാൻപാമ്പുകടിയേറ്റാൽ സ്വീകരിക്കേണ്ട പ്രഥമശുശ്രൂഷയെക്കുറിച്ച് അധ്യാപകർക്കും വിദ്യാർത്ഥികൾക്കും പരിശീലനം നൽകണം.
- ആശുപത്രി വിവരങ്ങൾ: ആന്റി സ്നേക്ക് വെനം ലഭ്യമായ അടുത്തുള്ള ആശുപത്രികളുടെ വിവരങ്ങളും ഫോൺ നമ്പറുകളും സ്കൂൾ ഓഫീസിൽ പ്രദർശിപ്പിക്കണം.
- വാഹന സൗകര്യം: ആംബുലൻസ് സൗകര്യവും അത് ലഭ്യമാകുന്ന സ്ഥലവും കൃത്യമായി രേഖപ്പെടുത്തണം. ആംബുലൻസ് ലഭ്യമല്ലാത്ത പക്ഷം ഉപയോഗിക്കാൻ കഴിയുന്ന മറ്റ് വാഹനങ്ങളുടെ വിവരങ്ങളും സൂക്ഷിക്കണം.
- മോക്ഡ്രില്ലുകൾ: അപകട സാഹചര്യങ്ങൾ നേരിടാൻ സ്കൂളുകളിൽ കൃത്യമായ ഇടവേളകളിൽ മോക്ഡ്രില്ലുകൾ സംഘടിപ്പിക്കണം.
പരിശോധന നടത്തുന്ന ആറ് വകുപ്പുകൾ
താഴെ പറയുന്ന വകുപ്പുകളുടെ നേരിട്ടുള്ള പരിശോധനയ്ക്ക് ശേഷമേ ഇനി സ്കൂളുകൾക്ക് ഫിറ്റ്നസ് നൽകുകയുള്ളൂ:
- തദ്ദേശ സ്വയംഭരണം (എൻജിനിയറിങ് വിഭാഗം): കെട്ടിടത്തിന്റെ ഉറപ്പ് പരിശോധിക്കാൻ.
- കെ.എസ്.ഇ.ബി: വയറിങ് സുരക്ഷ ഉറപ്പാക്കാൻ.
- അഗ്നിരക്ഷാസേന: അഗ്നിശമന സംവിധാനങ്ങൾ പരിശോധിക്കാൻ
- ആരോഗ്യവകുപ്പ്: ശുചിത്വവും കുടിവെള്ള ലഭ്യതയും ഉറപ്പാക്കാൻ.
- വനംവകുപ്പ്: പാമ്പ് ശല്യം ഉൾപ്പെടെയുള്ളവ തടയാൻ.
- മോട്ടോർവാഹന വകുപ്പ്: സ്കൂൾ വാഹനങ്ങളുടെ സുരക്ഷ പരിശോധിക്കാൻ.
Summary: The Kerala Health and Family Welfare Department has issued comprehensive safety guidelines for schools to ensure student safety, specifically targeting snake bite prevention. Schools must now clear six departmental inspections—including Engineering, KSEB, Fire Force, Health, Forest, and Motor Vehicles—to obtain a fitness certificate. The guidelines emphasize cleaning surroundings, sealing building cracks, providing first-aid training to staff, and displaying emergency contact numbers for hospitals and ambulances.
