അമരാവതി: ആന്ധ്രപ്രദേശിലെ പോളവരം മണ്ഡലത്തിൽ നിന്നുള്ള ജനസേന പാർട്ടി എം.എൽ.എ ചിരി ബാലരാജു ഓൺലൈൻ തട്ടിപ്പിനിരയായി (Andhra MLA Online Fraud). റോഡ് ട്രാൻസ്പോർട്ട് അതോറിറ്റിയുടെ (RTA) ചലാൻ അടയ്ക്കാനുള്ള സന്ദേശമെന്ന വ്യാജേന ലഭിച്ച ലിങ്കിൽ ക്ലിക്ക് ചെയ്തതോടെ അദ്ദേഹത്തിന്റെ ബാങ്ക് അക്കൗണ്ടിൽ നിന്ന് 12 ലക്ഷം രൂപ നഷ്ടപ്പെട്ടു.
എം.എൽ.എയുടെ വാട്സാപ്പിലേക്കാണ് ആർ.ടി.എ ചലാൻ അടയ്ക്കാനുണ്ടെന്നും അത് അടയ്ക്കാനുള്ള ലിങ്ക് ഇതാണെന്നും കാണിച്ച് സന്ദേശം ലഭിച്ചത്. ഔദ്യോഗിക സന്ദേശമാണെന്ന് കരുതി അദ്ദേഹം ലിങ്കിൽ ക്ലിക്ക് ചെയ്യുകയായിരുന്നു. ലിങ്കിൽ ക്ലിക്ക് ചെയ്തതിന് പിന്നാലെ വിവിധ ഘട്ടങ്ങളിലായി ബാങ്ക് അക്കൗണ്ടിൽ നിന്ന് പണം പിൻവലിക്കപ്പെടുകയായിരുന്നു. ആകെ 12 ലക്ഷം രൂപയാണ് ബാലരാജുവിന് നഷ്ടമായത്. തട്ടിപ്പ് തിരിച്ചറിഞ്ഞ ഉടൻ അദ്ദേഹം പോലീസിനെ സമീപിച്ചു. ജീലുകുമില്ലി പോലീസ് സ്റ്റേഷനിൽ പരാതി നൽകിയതിനെത്തുടർന്ന് കേസെടുത്ത് അന്വേഷണം ആരംഭിച്ചു.
പ്രതികളെ കണ്ടെത്താനും നഷ്ടപ്പെട്ട പണം വീണ്ടെടുക്കാനുമുള്ള ശ്രമങ്ങൾ സൈബർ പോലീസിന്റെ സഹായത്തോടെ ഊർജ്ജിതമാക്കിയിട്ടുണ്ടെന്ന് പോലീസ് അറിയിച്ചു.
വാട്സാപ്പ് വഴിയോ എസ്.എം.എസ് വഴിയോ ലഭിക്കുന്ന അജ്ഞാത ലിങ്കുകളിൽ ക്ലിക്ക് ചെയ്യരുതെന്ന് സൈബർ വിദഗ്ധർ മുന്നറിയിപ്പ് നൽകുന്നു. ചലാൻ അടയ്ക്കാനും മറ്റും ഗവൺമെന്റിന്റെ ഔദ്യോഗിക വെബ്സൈറ്റുകൾ നേരിട്ട് സന്ദർശിക്കുകയോ ബാങ്ക് ആപ്പുകൾ ഉപയോഗിക്കുകയോ ചെയ്യുക.
Story Summary:
Chiri Balaraju, the Janasena Party MLA from Polavaram, Andhra Pradesh, lost ₹12 lakh in a cyber fraud case. He reportedly clicked on a malicious link sent to his WhatsApp, disguised as an RTA challan payment notification. Following the click, the amount was withdrawn from his bank account in multiple transactions. A case has been registered at the Jeelugumilli police station, and an investigation is underway to trace the culprits.
