മുംബൈ: ന്യൂസിലാൻഡിനെതിരായ ടി20 പരമ്പര ബുധനാഴ്ച ആരംഭിക്കാനിരിക്കെ, ഇന്ത്യൻ ബാറ്റിംഗ് നിരയിൽ നിർണ്ണായക മാറ്റങ്ങൾ പ്രഖ്യാപിച്ച് ക്യാപ്റ്റൻ സൂര്യകുമാർ യാദവ്. പരിക്കേറ്റ യുവതാരം തിലക് വർമയ്ക്ക് ആദ്യ മത്സരങ്ങളിൽ കളിക്കാനാവില്ലെന്ന് ഉറപ്പായതോടെ ഇഷാൻ കിഷനാകും മൂന്നാം നമ്പറിൽ ഇറങ്ങുക. നാഗ്പൂരിൽ നടന്ന വാർത്താ സമ്മേളനത്തിലാണ് സൂര്യകുമാർ ഇക്കാര്യം വ്യക്തമാക്കിയത്.
ഏകദേശം ഒരു വർഷത്തെ ഇടവേളയ്ക്ക് ശേഷമാണ് ഇഷാൻ കിഷൻ ഇന്ത്യൻ ടി20 ടീമിലേക്ക് തിരിച്ചെത്തുന്നത്. സയ്യിദ് മുഷ്താഖ് അലി ട്രോഫിയിൽ ജാർഖണ്ഡിനെ കിരീടത്തിലേക്ക് നയിച്ച തകർപ്പൻ പ്രകടനമാണ് ഇഷാന് വീണ്ടും ദേശീയ ടീമിലേക്കുള്ള വഴി തുറന്നത്.
2023 നവംബറിലായിരുന്നു താരം അവസാനമായി നീലക്കുപ്പായത്തിൽ കളിച്ചത്.
അതേസമയം , തന്റെ ബാറ്റിംഗ് പൊസിഷനിൽ വലിയ മാറ്റങ്ങൾ വരുത്തില്ലെന്ന് സൂര്യകുമാർ യാദവ് വ്യക്തമാക്കി. പ്രത്യേക സാഹചര്യങ്ങളിൽ മാത്രമേ താൻ മൂന്നാം നമ്പറിലേക്ക് കയറി വരികയുള്ളൂവെന്നും അതുവരെ ഇഷാൻ കിഷന് ആ സ്ഥാനം നൽകുമെന്നും അദ്ദേഹം പറഞ്ഞു. വരാനിരിക്കുന്ന ടി20 ലോകകപ്പിന് മുന്നോടിയായുള്ള അവസാനവട്ട പരീക്ഷണത്തിനാണ് ഇന്ത്യ ഈ പരമ്പരയിലൂടെ ലക്ഷ്യമിടുന്നത്.
അഞ്ച് മത്സരങ്ങളടങ്ങിയതാണ് ന്യൂസിലാൻഡ് പരമ്പര. ലോകകപ്പ് ടീമിനെ തീരുമാനിക്കുന്നതിൽ ഈ പരമ്പരയിലെ പ്രകടനം പല താരങ്ങൾക്കും നിർണ്ണായകമാകും.
