വാഷിംഗ്ടൺ: ലോകത്തെ ഏറ്റവും വലിയ വാതകപ്പാടമായ ഇറാന്റെ സൗത്ത് പാഴ്സിന് നേരെ ഇസ്രയേൽ നടത്തിയ ആക്രമണത്തിൽ അമേരിക്കയ്ക്ക് പങ്കില്ലെന്ന് പ്രസിഡന്റ് ഡൊണാൾഡ് ട്രംപ് (Donald Trump). ആക്രമണം ഇസ്രയേൽ സ്വന്തം നിലയ്ക്ക് ആസൂത്രണം ചെയ്തതാണെന്നും അമേരിക്കയുടെ അറിവോടുകൂടിയല്ല ഈ നീക്കമെന്നും ട്രംപ് വ്യക്തമാക്കി.
അതേസമയം, ഇസ്രയേൽ നീക്കത്തിന് തിരിച്ചടിയായി ഖത്തറിലെ ഊർജ്ജ കേന്ദ്രങ്ങളെ ലക്ഷ്യം വെക്കാനുള്ള ഇറാന്റെ നീക്കത്തിനെതിരെ ട്രംപ് കടുത്ത ഭാഷയിൽ മുന്നറിയിപ്പ് നൽകി.
ഗൾഫ് മേഖലയിലെ തന്ത്രപ്രധാന പങ്കാളിയായ ഖത്തറിന് നേരെയോ അവിടെയുള്ള അമേരിക്കൻ താൽപ്പര്യങ്ങൾക്ക് നേരെയോ ഇറാൻ മിസൈൽ തൊടുത്തുവിട്ടാൽ ഇറാന്റെ വാതകപ്പാടം ഭൂപടത്തിൽ നിന്ന് തുടച്ചുനീക്കുമെന്ന് ട്രംപ് ഭീഷണിപ്പെടുത്തി.
ഇറാന്റെ ആണവ-ഊർജ്ജ കേന്ദ്രങ്ങൾ ആക്രമിക്കുന്നതിനോട് അമേരിക്കയ്ക്ക് പൂർണ്ണ യോജിപ്പില്ലെങ്കിലും ഇസ്രയേലിന്റെ സുരക്ഷയിൽ വിട്ടുവീഴ്ച ചെയ്യില്ലെന്ന് അദ്ദേഹം പറഞ്ഞു.
യുദ്ധം ആഗോള വിപണിയെ തകർക്കുകയാണെന്നും മേഖലയിൽ ഉടൻ വെടിനിർത്തൽ വേണമെന്നും ട്രംപ് ആവശ്യപ്പെട്ടു.
മേഖലയിൽ പുകയുന്ന സംഘർഷം
ഇറാന്റെ രഹസ്യാന്വേഷണ മന്ത്രിയെ വധിച്ചതിന് പിന്നാലെ മേഖലയിൽ സംഘർഷം അതിരൂക്ഷമായി തുടരുകയാണ്. ഹോർമുസ് കടലിടുക്കിലെ ചരക്കുനീക്കം തടസ്സപ്പെടാതിരിക്കാൻ അമേരിക്കൻ നാവികസേന ജാഗ്രതയിലാണ്. എന്നാൽ യുദ്ധത്തിന് ചുക്കാൻ പിടിച്ച ശേഷം സമാധാനത്തെക്കുറിച്ച് സംസാരിക്കുകയും ഒപ്പം ഭീഷണി മുഴക്കുകയും ചെയ്യുന്ന ട്രംപിന്റെ ഇരട്ടത്താപ്പിനെതിരെ വലിയ പ്രതിഷേധമാണ് ഉയരുന്നത്.
Story Summary:
US President Donald Trump distanced Washington from Israel’s recent strike on Iran’s South Pars gas field, claiming it was an independent Israeli operation. However, Trump issued a stern warning to Tehran, stating that any retaliatory strike on Qatar’s energy hubs or US interests would result in the complete destruction of Iran’s gas infrastructure. This escalation follows the assassination of Iran’s Intelligence Minister.
