ടെൽ അവീവ്: ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു കൊല്ലപ്പെട്ടുവെന്ന തരത്തിൽ പ്രചരിക്കുന്ന വാർത്തകൾ വ്യാജമാണെന്ന് തെളിയിച്ച് പ്രധാനമന്ത്രിയുടെ ഓഫീസ്. ചൊവ്വാഴ്ച പുറത്തുവിട്ട ചിത്രത്തിൽ, ഇറാന്റെ മുതിർന്ന ഉദ്യോഗസ്ഥർക്കെതിരെയുള്ള സൈനിക നടപടികൾക്കും തന്ത്രപ്രധാനമായ നീക്കങ്ങൾക്കും നേരിട്ട് നേതൃത്വം നൽകുന്ന നെതന്യാഹുവിനെയാണ് കാണുന്നത്.(Netanyahu’s new pic released amid death rumours)
കഴിഞ്ഞ കുറച്ചുദിവസങ്ങളായി സോഷ്യൽ മീഡിയയിൽ നെതന്യാഹുവിനെക്കുറിച്ച് വിവിധ ഗൂഢാലോചനാ സിദ്ധാന്തങ്ങൾ പ്രചരിച്ചിരുന്നു. ഇറാന്റെ മിസൈൽ ആക്രമണത്തിലോ ഡ്രോൺ ആക്രമണത്തിലോ നെതന്യാഹു കൊല്ലപ്പെട്ടുവെന്നും ഇസ്രായേൽ ഇത് മറച്ചുവെക്കുകയാണെന്നുമായിരുന്നു പ്രധാന പ്രചാരണം.
എന്നാൽ പ്രധാനമന്ത്രി ജീവനോടെയുണ്ടെന്നും ഔദ്യോഗിക കൃത്യനിർവ്വഹണത്തിൽ മുഴുകിയിരിക്കുകയാണെന്നും ഇസ്രായേൽ ഭരണകൂടവും സ്വതന്ത്ര നിരീക്ഷകരും വ്യക്തമാക്കി. ഇതിന് പിന്നാലെയാണ് അദ്ദേഹം നൗറൂസ് ആശംസകൾ നേരുന്ന വീഡിയോയും ഇപ്പോൾ സൈനിക ആസ്ഥാനത്തിരിക്കുന്ന ചിത്രവും പുറത്തുവന്നത്. ഇറാൻ സുരക്ഷാ മേധാവി അലി ലാരിജാനിയെ ലക്ഷ്യമിട്ട് ഇസ്രായേൽ നടത്തിയ ആക്രമണത്തിന് പിന്നാലെയാണ് ഈ ചിത്രം പുറത്തുവരുന്നത് എന്നത് ശ്രദ്ധേയമാണ്.
