-ആലപ്പുഴ: പാർട്ടി വിട്ട മുതിർന്ന നേതാവ് ജി. സുധാകരനെതിരെ സി.പി.എം. സംഘടിപ്പിച്ച ബഹുജന പ്രകടനത്തിന് പൊലീസിന്റെ പൂട്ട്. അമ്പലപ്പുഴ ഏരിയ സെക്രട്ടറി ഉൾപ്പെടെ പ്രകടനം നടത്തിയ 500 സി.പി.എം. പ്രവർത്തകർക്കെതിരെയാണ് പൊലീസ് കേസെടുത്തത്. പൊതുവഴിയിൽ ഗതാഗത തടസ്സം സൃഷ്ടിച്ചതിനാണ് പൊലീസ് സ്വമേധയാ കേസെടുത്തത്.(CPM rally against G Sudhakaran, Police register case against 500 activists)
ജി. സുധാകരൻ സ്വതന്ത്രനായി മത്സരിക്കാൻ ഒരുങ്ങുന്ന പശ്ചാത്തലത്തിലാണ് പാർട്ടി ശക്തിപ്രകടനത്തിനായി ബഹുജന റാലി സംഘടിപ്പിച്ചത്. എന്നാൽ ഈ റാലിയെ പരിഹസിച്ചുകൊണ്ടാണ് ജി. സുധാകരൻ രംഗത്തെത്തിയത്. തനിക്കെതിരെ സംഘടിപ്പിച്ച റാലിയിൽ ആളെ കൂട്ടാൻ സി.പി.എമ്മിന് സാധിച്ചില്ലെന്ന് സുധാകരൻ വിമർശിച്ചു.
പാർട്ടിയുടെ ഔദ്യോഗിക പരിപാടിയായിട്ടും ജനപങ്കാളിത്തം കുറഞ്ഞത് തന്നോടുള്ള ജനങ്ങളുടെ താല്പര്യം കാരണമാണെന്നും അദ്ദേഹം അവകാശപ്പെട്ടു. തിരഞ്ഞെടുപ്പ് അടുത്തിരിക്കെ സുധാകരനെപ്പോലൊരു നേതാവ് പാർട്ടി വിടുന്നത് ആലപ്പുഴ ജില്ലയിൽ സി.പി.എമ്മിന് വലിയ വെല്ലുവിളിയാണ് ഉയർത്തുന്നത്.
