കോട്ടയം: ബിജെപി സ്ഥാനാർത്ഥി പട്ടിക പ്രഖ്യാപിച്ചതിന് പിന്നാലെ പാർട്ടി നേതൃത്വത്തിനെതിരെ പരസ്യമായി രംഗത്തുവന്ന അഡ്വ. നോബിൾ മാത്യുവിനെ ബിജെപിയുടെ പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തു. സംഘടനാ വിരുദ്ധ പ്രവർത്തനങ്ങൾ ചൂണ്ടിക്കാട്ടിയാണ് ബിജെപി സംസ്ഥാന നേതൃത്വത്തിന്റെ അടിയന്തര നടപടി.(Explosion in BJP, Adv. Noble Mathew suspended)
കാഞ്ഞിരപ്പള്ളി നിയമസഭാ മണ്ഡലത്തിൽ മത്സരിക്കാൻ ആഗ്രഹിച്ചിരുന്ന നോബിൾ മാത്യുവിനെ തഴഞ്ഞ്, ബിജെപി സംസ്ഥാന ജനറൽ സെക്രട്ടറി ജോർജ് കുര്യനെ അവിടെ സ്ഥാനാർത്ഥിയായി പ്രഖ്യാപിച്ചതാണ് തർക്കങ്ങൾക്ക് കാരണമായത്. കാഞ്ഞിരപ്പള്ളിയിൽ സ്വതന്ത്രനായി മത്സരിക്കാൻ നോബിൾ മാത്യു ഒരുങ്ങുന്നുവെന്ന സൂചന ലഭിച്ചതോടെയാണ് നേതൃത്വം കർശന നടപടി എടുത്തത്.
സ്ഥാനാർത്ഥി നിർണ്ണയത്തിൽ ഗ്രൂപ്പ് പോരും വീതംവെപ്പുമാണ് നടന്നതെന്ന് നോബിൾ മാത്യു ആരോപിച്ചു. പാർട്ടിക്ക് വേണ്ടി വിറകുവെട്ടുന്നവരെയും വെള്ളം കോരുന്നവരെയും തഴയുന്ന സമീപനമാണ് ഇപ്പോഴുള്ളതെന്നും അദ്ദേഹം കുറ്റപ്പെടുത്തി. കോട്ടയം ജില്ലയിലെ നിർണ്ണായക മണ്ഡലമായ കാഞ്ഞിരപ്പള്ളിയിൽ ജോർജ് കുര്യനെ രംഗത്തിറക്കി ക്രൈസ്തവ വോട്ടുകളിൽ വിള്ളൽ വീഴ്ത്താനാണ് ബിജെപി ലക്ഷ്യമിടുന്നത്.
