നല്ല മൊരിഞ്ഞതും കനം കുറഞ്ഞതുമായ ഇറ്റാലിയൻ പിസ്സ കഴിക്കാൻ ഇനി റെസ്റ്റോറന്റിൽ പോകേണ്ടതില്ല. ലോകപ്രശസ്തമായ ‘നിയോപോളിറ്റൻ’ ശൈലിയിലുള്ള പിസ്സ ഡഫ് വീട്ടിൽ എളുപ്പത്തിൽ തയ്യാറാക്കാനുള്ള റെസിപ്പി ഇതാ. കൈകൊണ്ടോ അല്ലെങ്കിൽ മിക്സർ ഉപയോഗിച്ചോ ഇത് വളരെ പെട്ടെന്ന് തയ്യാറാക്കാം. (Rustic Italian Pizza Dough Recipe)
ആവശ്യമായ ചേരുവകൾ:
മൈദ: 5 കപ്പ്
യീസ്റ്റ്: 1.5 ടീസ്പൂൺ
ഉപ്പ്: 1.5 ടീസ്പൂൺ
തണുത്ത വെള്ളം (Cold water): 2.25 കപ്പ്
ഒലിവ് ഓയിൽ: 1 ടേബിൾ സ്പൂൺ
തയ്യാറാക്കുന്ന വിധം:
മാവ് തയ്യാറാക്കുക: ഒരു വലിയ പാത്രത്തിൽ മൈദ, ഉപ്പ്, യീസ്റ്റ് എന്നിവ ചേർത്ത് നന്നായി യോജിപ്പിക്കുക. ഇതിലേക്ക് തണുത്ത വെള്ളം ഒഴിച്ച് പതുക്കെ കുഴയ്ക്കുക. ശേഷം മാവ് നന്നായി കുഴച്ചെടുക്കണം.. മാവ് ഒട്ടിപ്പിടിക്കാത്ത പരുവത്തിലാകണം.
വിശ്രമിക്കാൻ അനുവദിക്കുക: തയ്യാറാക്കിയ മാവ് 6 ഭാഗങ്ങളായി മുറിച്ച് ഉരുളകളാക്കുക. ഇതിന് മുകളിൽ അല്പം ഒലിവ് ഓയിൽ തടവി ഒരു പ്ലാസ്റ്റിക് കവർ കൊണ്ട് മൂടി 2 മണിക്കൂർ സാധാരണ താപനിലയിൽ വെക്കുക. (ഈ സമയത്ത് മാവ് പൊന്തി വരും. വേണമെങ്കിൽ ഇത് ഫ്രിഡ്ജിലോ ഫ്രീസറിലോ സൂക്ഷിക്കാവുന്നതാണ്).
പിസ്സ പരത്തുക: പൊന്തി വന്ന മാവ് എടുത്ത് അല്പം പൊടി തൂവി കൈകൾ കൊണ്ട് വട്ടത്തിൽ പരത്തുക. ഏകദേശം 10 ഇഞ്ച് വലിപ്പത്തിൽ കനം കുറച്ച് വേണം പരത്താൻ.
ടോപ്പിംഗുകൾ ചേർക്കാം: പരത്തിയ മാവിന് മുകളിൽ 2-3 ടേബിൾ സ്പൂൺ പിസ്സ സോസ് തേക്കുക. ഇതിന് മുകളിൽ മൊസറെല്ല ചീസ്, തക്കാളി, ഉള്ളി, മഷ്റൂം അല്ലെങ്കിൽ നിങ്ങളുടെ ഇഷ്ടമുള്ള ടോപ്പിംഗുകൾ ചേർക്കാം.
ബേക്കിംഗ്: പിസ്സ സ്റ്റോൺ ഉണ്ടെങ്കിൽ അത് ഓവനിലിട്ട് 525°F (അല്ലെങ്കിൽ ഓവനിലെ പരമാവധി ചൂട്) ചൂടാക്കുക. തയ്യാറാക്കിയ പിസ്സ സ്റ്റോണിലേക്ക് മാറ്റി 5 മുതൽ 7 മിനിറ്റ് വരെ ബേക്ക് ചെയ്യുക. പിസ്സയുടെ വശങ്ങൾ ഗോൾഡൻ ബ്രൗൺ നിറമാകുന്നത് വരെ വേവിക്കണം.
ഇനി പിസ്സ സ്റ്റോൺ ഇല്ലാത്തവർക്ക് വീട്ടിലെ തവ തന്നെ മതിയാകും. തവ നല്ല പോലെ ചൂടാക്കിയ ശേഷം, പിസ്സ താവയിലേക്ക് വച്ച 10 മിനിറ്റ് വരെ ചെറുതീയിൽ വേവിച്ചെടുക്കാം. തീ കൂടിയാൽ പിസ്സയുടെ രുചി മാറും.
വിളമ്പാം: ഓവനിൽ നിന്ന് പുറത്തെടുത്ത ശേഷം മുകളിൽ അല്പം ബേസിലും ചീസും വിതറി വിളമ്പാം.
