മുംബൈ: തന്റെ പുതിയ ഹരിയാൻവി ഗാനമായ ‘തതേരി’യിലെ വരികൾ വിവാദമായ പശ്ചാത്തലത്തിൽ മാപ്പ് പറഞ്ഞ് പ്രശസ്ത റാപ്പർ ബാദ്ഷാ (Badshah Apology Tateeree Song). ഗാനത്തിലെ വരികളും ദൃശ്യങ്ങളും സ്ത്രീകളെയും കുട്ടികളെയും മോശമായി ചിത്രീകരിക്കുന്നു എന്നാരോപിച്ച് ഹരിയാന സംസ്ഥാന വനിതാ കമ്മീഷൻ താരത്തിന് നോട്ടീസ് അയച്ചിരുന്നു. ഇതിന് പിന്നാലെയാണ് ഇൻസ്റ്റാഗ്രാം വീഡിയോയിലൂടെ ബാദ്ഷാ ഖേദപ്രകടനം നടത്തിയത്.
താൻ ഒരു അഭിമാനിയായ ഹരിയാൻവിക്കാരനാണെന്നും തന്റെ ഭാഷയും ഭക്ഷണവും സ്വത്വവുമെല്ലാം ഹരിയാനയുമായി ബന്ധപ്പെട്ടതാണെന്നും ബാദ്ഷാ പറഞ്ഞു. ഹരിയാനയിലെ സ്ത്രീകളെയോ കുട്ടികളെയോ തരംതാഴ്ത്തി സംസാരിക്കാൻ താൻ ഒരിക്കലും ആഗ്രഹിച്ചിട്ടില്ല. എതിരാളികളെ താഴ്ത്തിക്കെട്ടുന്ന വരികൾ ഹിപ്-ഹോപ്പ് സംഗീതത്തിൽ സാധാരണമാണെന്നും ആ അർത്ഥത്തിലാണ് വരികൾ ഉൾപ്പെടുത്തിയതെന്നും അദ്ദേഹം വിശദീകരിച്ചു. ആരുടെയെങ്കിലും വികാരങ്ങൾ വ്രണപ്പെട്ടിട്ടുണ്ടെങ്കിൽ ഹരിയാനയുടെ മകനായി കണ്ട് തനിക്ക് മാപ്പ് നൽകണമെന്നും താരം അഭ്യർത്ഥിച്ചു.
View this post on Instagram
ഗാനത്തിൽ സ്കൂൾ യൂണിഫോം ധരിച്ച പെൺകുട്ടികളെ ഉൾപ്പെടുത്തിയതിനും വരികളിലെ അശ്ലീലതയ്ക്കും എതിരെ പാനിപ്പത്തിലെ നാരീ തൂ നാരായണി സൻസ്ത ഉൾപ്പെടെയുള്ള സംഘടനകൾ പരാതി നൽകിയിരുന്നു. മാർച്ച് 13-ന് ഹരിയാന വനിതാ കമ്മീഷന് മുൻപാകെ ഹാജരായി മൊഴി നൽകാൻ താരത്തോട് ആവശ്യപ്പെട്ടിട്ടുണ്ട്. ഹരിയാനയുടെ സംസ്കാരത്തെയും ഭാഷയെയും ആഗോളതലത്തിൽ എത്തിക്കാനാണ് താൻ എപ്പോഴും ശ്രമിച്ചിട്ടുള്ളതെന്നും ബാദ്ഷാ പറഞ്ഞു.
