കണ്ണൂർ: നിയമസഭാ തെരഞ്ഞെടുപ്പിൽ പേരാവൂർ മണ്ഡലത്തിൽ മത്സരിക്കുമെന്ന വാർത്തകളോട് പ്രതികരിച്ച് കെ.കെ. ശൈലജ. ഇടതുപക്ഷത്തിന് ജയിക്കാൻ സാധിക്കുന്ന മണ്ഡലമാണെന്നും അവിടെ ആര് സ്ഥാനാർത്ഥിയായാലും എൽഡിഎഫ് വിജയിക്കുമെന്നും അവർ പറഞ്ഞു.(Whoever stands as the LDF candidate will win, says KK Shailaja)
പാർട്ടി സ്ഥാനാർത്ഥികളെ പാർട്ടി തന്നെ തീരുമാനിക്കുമെന്ന് വ്യക്തമാക്കിയ ശൈലജ, നാളെ ചേരുന്ന സിപിഎം സംസ്ഥാന സെക്രട്ടേറിയേറ്റ് യോഗത്തിന് ശേഷം എട്ടാം തീയതിയോടെ ഔദ്യോഗിക സ്ഥാനാർത്ഥി പട്ടിക പ്രഖ്യാപിക്കുമെന്നും അറിയിച്ചു. കഴിഞ്ഞ തവണ സംസ്ഥാനത്തെ ഏറ്റവും ഉയർന്ന ഭൂരിപക്ഷത്തിൽ മട്ടന്നൂരിൽ നിന്ന് വിജയിച്ച ശൈലജയെ ഇത്തവണ യുഡിഎഫ് കോട്ടയായ പേരാവൂർ പിടിച്ചെടുക്കാൻ നിയോഗിക്കുമെന്നാണ് സൂചന.
പേരാവൂർ ഇടതുപക്ഷത്തിന് അനുകൂലമായ മണ്ഡലമാണെന്ന് അവർ അവകാശപ്പെട്ടു. പാർട്ടി സ്ഥാനാർത്ഥി പട്ടിക മാർച്ച് എട്ടിന് പുറത്തിറങ്ങും. ഭരണത്തുടർച്ച ലക്ഷ്യമിടുന്ന എൽഡിഎഫും ഭരണം തിരിച്ചുപിടിക്കാൻ ശ്രമിക്കുന്ന യുഡിഎഫും തമ്മിൽ ശക്തമായ പോരാട്ടത്തിനാണ് കണ്ണൂർ ഒരുങ്ങുന്നത്.
