ടുണിസ്: കഴിഞ്ഞ ദശകത്തിൽ സിറിയയിലേക്ക് ജിഹാദി പോരാളികളെ അയക്കാൻ സൗകര്യമൊരുക്കി എന്ന കുറ്റത്തിന് മുൻ ടുണീഷ്യൻ പ്രധാനമന്ത്രി അലി ലരായേദിനെ 24 വർഷത്തെ തടവിന് ശിക്ഷിച്ചു (Former Tunisian PM Ali Larayedh Jailed). വെള്ളിയാഴ്ച ടുണീഷ്യയിലെ കോടതിയാണ് വിധി പ്രസ്താവിച്ചത്. 2013-14 കാലഘട്ടത്തിൽ പ്രധാനമന്ത്രിയായിരുന്ന ലരായേദ് പ്രമുഖ ഇസ്ലാമിസ്റ്റ് പാർട്ടിയായ എന്നഹ്ദയുടെ മുതിർന്ന നേതാവ് കൂടിയാണ്.
2011-ലെ വിപ്ലവത്തിന് ശേഷം ടുണീഷ്യയിൽ നിന്ന് നൂറുകണക്കിന് യുവാക്കൾ സിറിയ, ഇറാഖ്, ലിബിയ എന്നിവിടങ്ങളിൽ ഇസ്ലാമിക് സ്റ്റേറ്റ് ഗ്രൂപ്പുകളിൽ ചേരാൻ പോയിരുന്നു. എന്നഹ്ദ പാർട്ടി അധികാരത്തിലിരുന്ന സമയത്ത് ഇവർക്ക് യാത്രാ സൗകര്യങ്ങളും മറ്റും ചെയ്തുകൊടുത്തു എന്നാണ് കേസ്. എന്നാൽ ഈ ആരോപണങ്ങൾ എന്നഹ്ദ പാർട്ടി ശക്തമായി നിഷേധിച്ചു. പ്രസിഡന്റ് കൈസ് സയീദ് 2021-ൽ പാർലമെന്റ് പിരിച്ചുവിട്ട് അധികാരം പിടിച്ചെടുത്തതിന് ശേഷം പ്രതിപക്ഷത്തെ അടിച്ചമർത്താൻ നടത്തുന്ന രാഷ്ട്രീയ പകപോക്കലിന്റെ ഭാഗമാണ് ഈ ശിക്ഷയെന്ന് അവർ ആരോപിച്ചു.
2022 മുതൽ തടവിൽ കഴിയുന്ന ലരായേദ് താൻ നിരപരാധിയാണെന്നും അനീതിക്ക് ഇരയാവുകയാണെന്നും കോടതിയിൽ പറഞ്ഞു. ലരായേദിനൊപ്പം ആഭ്യന്തര മന്ത്രാലയത്തിലെ മുൻ ഉദ്യോഗസ്ഥരുൾപ്പെടെ മറ്റ് ഏഴ് പ്രതികൾക്കും കോടതി ശിക്ഷ വിധിച്ചിട്ടുണ്ട്. മൂന്ന് വർഷം മുതൽ 24 വർഷം വരെയാണ് ഇവർക്ക് ലഭിച്ച തടവുശിക്ഷ. ഈ വിധിക്കെതിരെ അപ്പീൽ നൽകാൻ പ്രതിഭാഗത്തിന് അവസരമുണ്ട്. ടുണീഷ്യയിലെ ജനാധിപത്യ സംവിധാനങ്ങളും പ്രതിപക്ഷ സ്വരങ്ങളും ഇല്ലാതാക്കാനുള്ള നീക്കമാണ് ഭരണകൂടം നടത്തുന്നതെന്ന് അന്താരാഷ്ട്ര മനുഷ്യാവകാശ സംഘടനകളും ആശങ്ക പ്രകടിപ്പിച്ചിട്ടുണ്ട്.
Summary: Former Tunisian PM Ali Larayedh was sentenced to 24 years in prison for allegedly facilitating the travel of jihadists to Syria.
