ഫരീദാബാദ്: വിവാഹമോചന കേസ് കോടതിയിൽ ഇരിക്കെ, വഴക്കിനിടെ ഭർത്താവ് ഭാര്യയെ വെടിവെച്ചുകൊന്നു (Faridabad Murder Case). ഫരീദാബാദിലെ ബസന്ത്പൂർ ഗ്രാമത്തിലെ സൺലൈറ്റ് കോളനിയിൽ വെള്ളിയാഴ്ച രാത്രി എട്ട് മണിയോടെയാണ് സംഭവം നടന്നത്. ബിഹാർ സ്വദേശിയായ സംഗീത ദേവി (30) ആണ് കൊല്ലപ്പെട്ടത്. കൃത്യത്തിന് ശേഷം പ്രതിയും കുടുംബാംഗങ്ങളും സംഭവസ്ഥലത്ത് നിന്ന് ഓടി രക്ഷപ്പെട്ടു.
ഭർത്താവും വീട്ടുകാരുമായി പിണങ്ങിക്കഴിഞ്ഞിരുന്ന സംഗീത തന്റെ രണ്ട് മക്കൾക്കൊപ്പം ഫരീദാബാദിലാണ് താമസിച്ചിരുന്നത്. വെള്ളിയാഴ്ച രാത്രി സംഗീതയുടെ വീട്ടിലെത്തിയ ഭർത്താവും ബന്ധുക്കളും അവരുമായി തർക്കത്തിൽ ഏർപ്പെടുകയും ഇത് കടുത്ത വാക്കേറ്റത്തിൽ കലാശിക്കുകയുമായിരുന്നു. ഇതിനിടെ പ്രകോപിതനായ ഭർത്താവ് സംഗീതയ്ക്ക് നേരെ മൂന്ന് തവണ വെടിയുതിർത്തു. രണ്ട് വെടിയുണ്ടകൾ സംഗീതയുടെ ശരീരത്തിൽ ഏൽക്കുകയും അവർ രക്തം വാർന്ന് നിലത്ത് വീഴുകയും ചെയ്തു. വെടിശബ്ദം കേട്ട് അയൽവാസികൾ ഓടിയെത്തിയതോടെ പ്രതികൾ സ്ഥലത്തുനിന്ന് കടന്നുകളഞ്ഞു.
സംഗീതയുടെ പിതാവും നാട്ടുകാരും ചേർന്ന് അവരെ ഉടൻ തന്നെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവച്ചിരുന്നു. പല്ല പോലീസ് സ്റ്റേഷനിൽ കൊലപാതകത്തിന് കേസെടുത്ത് അന്വേഷണം ആരംഭിച്ചു. പ്രതികൾക്കായി തിരച്ചിൽ ഊർജ്ജിതമാക്കിയിട്ടുണ്ടെന്നും പ്രാഥമിക അന്വേഷണത്തിൽ വിവാഹമോചനവുമായി ബന്ധപ്പെട്ട തർക്കമാണ് കൊലപാതകത്തിന് കാരണമെന്ന് വ്യക്തമായതായും ഇൻസ്പെക്ടർ സത്യപ്രകാശ് അറിയിച്ചു. മൃതദേഹം പോസ്റ്റ്മോർട്ടത്തിനായി മോർച്ചറിയിലേക്ക് മാറ്റി.
