ധാക്ക: ബംഗ്ലാദേശിൽ പുതിയ രാഷ്ട്രീയ ക്രമം നിർണ്ണയിക്കുന്ന പൊതുതിരഞ്ഞെടുപ്പ് നടക്കുകയാണ്. രാവിലെ 7:30-ന് ആരംഭിച്ച വോട്ടെടുപ്പ് വൈകിട്ട് 4:30 വരെ തുടരും. 12.7 കോടി വോട്ടർമാരാണ് 300 പാർലമെന്റ് സീറ്റുകളിലേക്കായി വിധിയെഴുതുന്നത്. ഷെയ്ഖ് ഹസീനയുടെ അവാമി ലീഗ് നിരോധിക്കപ്പെട്ട സാഹചര്യത്തിൽ നടക്കുന്ന ഈ തിരഞ്ഞെടുപ്പ് ബംഗ്ലാദേശിന്റെ ജനാധിപത്യ പുനഃസ്ഥാപനത്തിലെ സുപ്രധാന നാഴികക്കല്ലാണ്.(Bangladesh Elections 2026, Polling underway, 1981 candidates in fight)
17 വർഷത്തെ പ്രവാസത്തിന് ശേഷം തിരിച്ചെത്തിയ താരിഖ് റഹ്മാന്റെ നേതൃത്വത്തിലുള്ള ബംഗ്ലാദേശ് നാഷണൽ പാർട്ടി വൻ വിജയപ്രതീക്ഷയിലാണ്. അഴിമതി നിർമ്മാർജ്ജനവും സാമ്പത്തിക പരിഷ്കരണവുമാണ് ഇവരുടെ പ്രധാന വാഗ്ദാനം.
ഷഫീഖുർ റഹ്മാന്റെ നേതൃത്വത്തിലുള്ള 11 കക്ഷികളുടെ സഖ്യമാണ് ബി.എൻ.പിയുടെ പ്രധാന എതിരാളി. പ്രക്ഷോഭത്തിന് നേതൃത്വം നൽകിയ നഹീദ് ഇസ്ലാമിന്റെ നാഷണൽ സിറ്റിസൺ പാർട്ടിയും ഈ സഖ്യത്തിനൊപ്പമുണ്ട്. തിരഞ്ഞെടുപ്പിനൊപ്പം തന്നെ ഭരണഘടനാ പരിഷ്കരണത്തിനായുള്ള ജൂലൈ ചാർട്ടർ ഹിതപരിശോധനയും നടക്കുന്നുണ്ട്. വോട്ടർമാർക്ക് രണ്ട് ബാലറ്റുകളാണ് നൽകുന്നത്. സ്ഥാനാർത്ഥിക്കായി വെള്ള ബാലറ്റും ഹിതപരിശോധനയ്ക്കായി പിങ്ക് ബാലറ്റും. ബംഗ്ലാദേശിലെ രാഷ്ട്രീയ മാറ്റങ്ങളെ ഇന്ത്യ സസൂക്ഷ്മം നിരീക്ഷിക്കുന്നുണ്ട്.
