മിയാമി: ലോക ഫുട്ബോൾ താരം ലയണൽ മെസ്സിയുടെ വരവോടെ ഇന്റർ മിയാമി ക്ലബ്ബിന്റെ ആസ്തിയിൽ വൻ വർധനവ്. സ്പോർട്ടിക്കോ പുറത്തുവിട്ട പുതിയ കണക്കുകൾ പ്രകാരം 1.45 ബില്യൺ ഡോളർ മൂല്യവുമായി മേജർ ലീഗ് സോക്കറിലെ (MLS) ഏറ്റവും മൂല്യമുള്ള ക്ലബ്ബായി ഇന്റർ മിയാമി മാറി (Inter Miami MLS Club Valuation). കഴിഞ്ഞ വർഷത്തെ അപേക്ഷിച്ച് 22 ശതമാനം വർധനവാണ് ക്ലബ്ബിന്റെ മൂല്യത്തിലുണ്ടായത്. ഇതോടെ ദീർഘകാലമായി ഒന്നാം സ്ഥാനത്തുണ്ടായിരുന്ന ലോസ് ഏഞ്ചൽസ് എഫ്സിയെ (LAFC) മറികടന്ന് മിയാമി ഈ നേട്ടം സ്വന്തമാക്കി.
മെസ്സിയുടെ സാന്നിധ്യം ക്ലബ്ബിന് ആദ്യ എംഎൽഎസ് കപ്പ് നേടിക്കൊടുത്തതിന് പിന്നാലെയാണ് ഈ സാമ്പത്തിക നേട്ടം. അതേസമയം ലീഗിലെ മറ്റു ചില ക്ലബ്ബുകളുടെ അവസ്ഥ അത്ര ശുഭകരമല്ല. സാൻ ജോസ് എർത്ത്ക്വാക്ക്സ്, വാൻകൂവർ വൈറ്റ്ക്യാപ്സ്, സിഎഫ് മോൺട്രിയൽ എന്നീ ക്ലബ്ബുകളുടെ മൂല്യത്തിൽ ഇടിവ് രേഖപ്പെടുത്തിയിട്ടുണ്ട്. ലീഗിലെ ആദ്യ പത്ത് ടീമുകൾ വൻ ലാഭമുണ്ടാക്കുമ്പോൾ താഴെ തട്ടിലുള്ള ടീമുകളുടെ വളർച്ചാ നിരക്ക് വെറും 2 ശതമാനത്തിൽ ഒതുങ്ങുന്നുവെന്നാണ് റിപ്പോർട്ട്.
