ആലപ്പുഴ: കായംകുളം കെ.എസ്.ആർ.ടി.സി ബസ് സ്റ്റേഷന് ഇനി ആധുനികതയുടെ തിളക്കം. അത്യാധുനിക സൗകര്യങ്ങളോടെ നിർമ്മിക്കുന്ന പുതിയ ഡിപ്പോ കെട്ടിടത്തിന്റെ നിർമ്മാണോദ്ഘാടനം ഇന്ന് വൈകുന്നേരം 3.30-ന് ഗതാഗത വകുപ്പ് മന്ത്രി കെ.ബി. ഗണേഷ് കുമാർ നിർവ്വഹിക്കും. (Kayamkulam KSRTC depot gets a new look, Transport Minister to inaugurate construction today)
കെ.എസ്.ആർ.ടി.സിയുടെ ആദ്യകാല ഡിപ്പോകളിൽ ഒന്നായ കായംകുളത്ത്, എല്ലാവിധ നൂതന സംവിധാനങ്ങളോടും കൂടിയ കെട്ടിടമാണ് ഉയരുന്നതെന്ന് മന്ത്രി വ്യക്തമാക്കി. ഏകദേശം 19,500 ചതുരശ്ര അടി വിസ്തീർണ്ണത്തിലാണ് പുതിയ ബസ് സ്റ്റേഷൻ കെട്ടിടം വിഭാവനം ചെയ്തിരിക്കുന്നത്. യാത്രക്കാർക്കും ജീവനക്കാർക്കും ഒരുപോലെ ഗുണകരമാകുന്ന താഴെ പറയുന്ന സൗകര്യങ്ങൾ ഇവിടെയുണ്ടാകും.
വിശാലമായ ശീതീകരിച്ച കാത്തിരുപ്പ് കേന്ദ്രങ്ങൾ, ക്ലോക്ക് റൂം, ശീതീകരിച്ച ഡോർമെറ്ററികൾ, മെഡിക്കൽ റൂം, ഭിന്നശേഷി സൗഹൃദ സംവിധാനങ്ങൾ എന്നിവ യാത്രക്കാർക്കായി ലഭ്യമാക്കും. ജീവനക്കാർക്കായി ആധുനിക ഓഫീസ് സൗകര്യങ്ങളും വിശ്രമമുറികളും ഒരുക്കും.
ലിഫ്റ്റ്, കൊറിയർ & ലോജിസ്റ്റിക് റൂം, വ്യാപാര കേന്ദ്രങ്ങൾ, പേ ആൻഡ് പാർക്ക് സൗകര്യം, സുരക്ഷിതമായ ശൗചാലയങ്ങൾ, മലിനജല സംസ്കരണത്തിനായി അത്യാധുനിക സ്വീവേജ് ട്രീറ്റ്മെന്റ് പ്ലാന്റും സജ്ജീകരിക്കും. യു. പ്രതിഭ എം.എൽ.എ അധ്യക്ഷത വഹിക്കുന്ന ചടങ്ങിൽ രാഷ്ട്രീയ, സാംസ്കാരിക രംഗത്തെ പ്രമുഖർ പങ്കെടുക്കും.
