ചെന്നൈ: തമിഴ്നാട് നിയമസഭാ തിരഞ്ഞെടുപ്പിൽ വിജയ്യുടെ ടിവികെ നിർണ്ണായക ശക്തിയാകുമെന്ന് എക്സിറ്റ് പോളുകൾ സൂചിപ്പിച്ചതോടെ സംസ്ഥാനത്ത് വമ്പൻ രാഷ്ട്രീയ നീക്കങ്ങൾക്ക് സാധ്യതയേറുന്നു. ഇതിന്റെ ഭാഗമായി വിജയ് വ്യാഴാഴ്ച ചെന്നൈയിൽ സ്ഥാനാർത്ഥികളുടെ നിർണ്ണായക യോഗം വിളിച്ചുചേർത്തു.(Vijay calls meeting of candidates after exit poll results, AIADMK ready for discussion)
വ്യാഴാഴ്ച ഉച്ചയ്ക്ക് ഒരു മണിയോടെ ചെന്നൈയിലെ പാർട്ടി ആസ്ഥാനത്താണ് യോഗം ആരംഭിച്ചത്. സ്ഥാനാർത്ഥികളുമായാണ് യോഗം. ഓരോ മണ്ഡലത്തിലെയും ബൂത്ത് തലത്തിലുള്ള വിവരങ്ങളും തിരഞ്ഞെടുപ്പിന് ശേഷം സ്വീകരിക്കേണ്ട രാഷ്ട്രീയ നിലപാടുകളും യോഗം ചർച്ച ചെയ്യും.
ടിവികെ മികച്ച സീറ്റുകൾ നേടുമെന്ന പ്രവചനങ്ങൾ പുറത്തുവന്നതോടെ, പ്രതിപക്ഷമായ എഐഎഡിഎംകെ വിജയ്യുടെ പാർട്ടിയുമായി ചർച്ചകൾക്ക് സാധ്യത തേടുന്നതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. ഫലം പുറത്തുവന്ന ശേഷം സീറ്റ് നില അനുസരിച്ചായിരിക്കും ഈ നീക്കങ്ങൾ. എക്സിറ്റ് പോളുകൾ ടിവികെ തമിഴ്നാട്ടിൽ വലിയ അട്ടിമറി നടത്തുമെന്ന് പ്രവചിച്ചിട്ടുണ്ട്.
