സെറംബാൻ: ബാക്കിവന്ന മാംസാഹാരങ്ങൾ കഴുകി വൃത്തിയാക്കി അടുത്ത ദിവസം വീണ്ടും വിളമ്പാൻ ശ്രമിച്ച മലേഷ്യയിലെ ഒരു പ്രമുഖ റെസ്റ്റോറന്റ് അധികൃതർ അടപ്പിച്ചു (Worker washing leftover food). മലേഷ്യയിലെ സെറംബാനിലുള്ള പാം മാളിനുള്ളിൽ പ്രവർത്തിക്കുന്ന ‘നാസി കന്ദർ’ റെസ്റ്റോറന്റിലാണ് ആരോഗ്യവകുപ്പിന്റെ നടപടി ഉണ്ടായത്. രാത്രി വൈകി റെസ്റ്റോറന്റിലെ ജീവനക്കാരൻ ചിക്കൻ, മട്ടൺ, പയർ വിഭവങ്ങൾ എന്നിവയിലെ ഗ്രേവി കഴുകിക്കളയുന്ന ദൃശ്യങ്ങൾ വഴിയാത്രക്കാരൻ മൊബൈലിൽ പകർത്തുകയായിരുന്നു. ഈ വീഡിയോ സോഷ്യൽ മീഡിയയിൽ വൈറലായതോടെയാണ് നഗ്രി സെംബിലാൻ ആരോഗ്യവകുപ്പ് അന്വേഷണം നടത്തിയത്.
വീഡിയോ പകർത്തിയ വ്യക്തി ജീവനക്കാരനെ ചോദ്യം ചെയ്തപ്പോൾ, ഈ ഭക്ഷണം അടുത്ത ദിവസം വീണ്ടും പാകം ചെയ്ത് ഉപയോഗിക്കാനാണെന്ന് അയാൾ സമ്മതിച്ചതായാണ് റിപ്പോർട്ട്. ഇത് അപകടകരമായ ഒന്നല്ലെന്ന ജീവനക്കാരന്റെ മറുപടി വലിയ പ്രതിഷേധത്തിന് ഇടയാക്കി. തുടർന്ന് 1983-ലെ മലേഷ്യൻ ഫുഡ് ആക്ട് സെക്ഷൻ 11 പ്രകാരം റെസ്റ്റോറന്റ് 14 ദിവസത്തേക്ക് അടച്ചുപൂട്ടാൻ അധികൃതർ ഉത്തരവിട്ടു. ഭക്ഷ്യ സുരക്ഷാ മാനദണ്ഡങ്ങൾ ലംഘിച്ചതിന് ഏകദേശം 13,000 രൂപയോളം (750 മലേഷ്യൻ റിംഗിറ്റ്) പിഴയും റെസ്റ്റോറന്റ് ഉടമയ്ക്ക് ചുമത്തിയിട്ടുണ്ട്.
പാകം ചെയ്ത ഭക്ഷണം വീണ്ടും കഴുകി ഉപയോഗിക്കുന്നത് ഗുരുതരമായ ഭക്ഷ്യവിഷബാധയ്ക്കും മറ്റ് ആരോഗ്യപ്രശ്നങ്ങൾക്കും കാരണമാകുമെന്ന് ആരോഗ്യവിദഗ്ദ്ധർ മുന്നറിയിപ്പ് നൽകി. റെസ്റ്റോറന്റ് അടച്ചിട്ട് മൂന്ന് ദിവസം തികയുമ്പോൾ ഉദ്യോഗസ്ഥർ വീണ്ടും പരിശോധന നടത്തുകയും ശുചിത്വ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തുകയും ചെയ്യും. ഈ സംഭവം മലേഷ്യയിലെ റെസ്റ്റോറന്റുകളുടെ ശുചിത്വ നിലവാരത്തെക്കുറിച്ച് വലിയ ചർച്ചകൾക്കാണ് വഴിവെച്ചിരിക്കുന്നത്.
Summary: A restaurant in Seremban, Malaysia, was ordered to close for 14 days after a viral video showed a worker washing leftover food to be reused. The owner was fined RM 750 (approx. ₹13,000) following public outrage over the unhygienic practice at the nasi kandar eatery.
