ചൈനയിലെ യുനാൻ പ്രവിശ്യയിൽ പാമ്പുകടിയേറ്റ ഭർത്താവിനെ രക്ഷിക്കാൻ ശ്രമിച്ച ഭാര്യയ്ക്കും വിഷബാധയേറ്റു. കൃഷിസ്ഥലത്ത് വെച്ച് മൂർഖൻ പാമ്പിന്റെ കടിയേറ്റ ഭർത്താവിന്റെ മുറിവിൽ നിന്ന് ഭാര്യ വിഷം വായ വെച്ച് വലിച്ചെടുക്കാൻ ശ്രമിച്ചതാണ് അപകടമായത്. ടെലിവിഷൻ സീരിയലുകളിൽ കണ്ടുപരിചയിച്ച രീതി പിന്തുടർന്നാണ് ഇവർ ഇത്തരത്തിലൊരു സാഹസത്തിന് മുതിർന്നത്. (Venom Sucking)
യുയാങ് കൗണ്ടിയിലെ കർഷകനായ ഭർത്താവിന്റെ വിരലിലാണ് മൂർഖൻ പാമ്പ് കടിച്ചത്. കടിയേറ്റ ഉടൻ തന്നെ ഭർത്താവിന് തലകറക്കവും ക്ഷീണവും അനുഭവപ്പെട്ടു. പരിഭ്രാന്തയായ ഭാര്യ ഒരു മുൻകരുതലുമില്ലാതെ മുറിവിൽ നിന്ന് വായ ഉപയോഗിച്ച് വിഷം വലിച്ചെടുക്കാൻ ശ്രമിച്ചു. കുറച്ചു മണിക്കൂറുകൾക്ക് ശേഷം ഭാര്യയ്ക്കും മുഖത്തും കൈകാലുകളിലും തരിപ്പ് അനുഭവപ്പെടുകയും കടുത്ത ക്ഷീണം അനുഭവപ്പെടുകയും ചെയ്തതോടെ ഇരുവരെയും ആശുപത്രിയിൽ പ്രവേശിപ്പിച്ചു. ഹോങ്കെ പ്രിഫെക്ചർ നം.3 പീപ്പിൾസ് ഹോസ്പിറ്റലിലെ ഡോക്ടർമാർ ഇവർക്ക് ആന്റി-വെനം നൽകിയാണ് ചികിത്സിച്ചത്. ഏതാനും ദിവസത്തെ ചികിത്സയ്ക്ക് ശേഷം ഇരുവരും സുഖം പ്രാപിച്ചു.
പാമ്പുകടിയേറ്റ ഭാഗത്ത് വായ വെച്ച് വിഷം വലിച്ചെടുക്കുന്നത് അപകടകരമാണെന്ന് ഡോക്ടർമാർ മുന്നറിയിപ്പ് നൽകുന്നു. വായയ്ക്കകത്തെ ശ്ലേഷ്മസ്തരത്തിലൂടെ (oral mucosa) വിഷം വളരെ വേഗത്തിൽ രക്ഷപ്പെടുത്താൻ ശ്രമിക്കുന്നയാളുടെ രക്തചംക്രമണത്തിലേക്ക് കടന്നുകയറാൻ സാധ്യതയുണ്ട്. കൂടാതെ, പാമ്പിന്റെ വിഷം വളരെ വേഗത്തിൽ ശരീര കലകളിലേക്കും രക്തത്തിലേക്കും വ്യാപിക്കുന്നതിനാൽ മുറിവിൽ നിന്ന് വായ കൊണ്ട് വിഷം പുറത്തെടുക്കുക എന്നത് അസാധ്യമാണ്.
പാമ്പുകടിയേറ്റാൽ മുറിവ് മുറിക്കുന്നതോ, ചൂടാക്കുന്നതോ, ഐസ് വെക്കുന്നതോ ആയ രീതികൾ തീർത്തും ഒഴിവാക്കണം. കടിയേറ്റാൽ ഉടൻ തന്നെ ആംബുലൻസ് വിളിക്കുകയോ ആശുപത്രിയിൽ എത്തിക്കുകയോ ചെയ്യുക എന്നതാണ് ഏറ്റവും സുരക്ഷിതമായ മാർഗ്ഗം. കടിച്ചത് ഏത് പാമ്പാണെന്ന് തിരിച്ചറിയാൻ പാമ്പിന്റെ നിറം, പാറ്റേൺ, തലയുടെ ആകൃതി എന്നിവ ശ്രദ്ധിക്കുകയോ ഫോട്ടോ എടുക്കുകയോ ചെയ്താൽ ഡോക്ടർമാർക്ക് കൃത്യമായ ആന്റി-വെനം നൽകാൻ സഹായിക്കും.
Summary: A woman in China’s Yunnan province was poisoned after attempting to suck snake venom from her husband’s hand following a cobra bite, a rescue method she mistakenly learned from television. Doctors at the local hospital, who treated both with antivenom, warned that sucking venom is ineffective and dangerous, as the poison quickly enters the rescuer’s bloodstream through oral mucous membranes. Instead of attempting amateur medical procedures, individuals bitten by snakes should minimize movement and seek professional emergency medical care immediately.
