കാബൂൾ : അതിർത്തിയിൽ പാകിസ്ഥാനും അഫ്ഗാനിസ്ഥാനും തമ്മിലുള്ള സൈനിക ഏറ്റുമുട്ടൽ രൂക്ഷമായ സാഹചര്യത്തിൽ സമാധാന ശ്രമങ്ങളുമായി ഇറാനും സൗദി അറേബ്യയും രംഗത്ത്. പുണ്യമാസമായ റമദാനിൽ ഇരുരാജ്യങ്ങളും തമ്മിലുള്ള അഭിപ്രായവ്യത്യാസങ്ങൾ ചർച്ചകളിലൂടെയും സമവായത്തിലൂടെയും പരിഹരിക്കണമെന്ന് ഇറാൻ വിദേശകാര്യ മന്ത്രി അബ്ബാസ് അരഗ്ചി ആവശ്യപ്പെട്ടു.(This should not happen during the holy month of Ramadan, Iran and Saudi Arabia offer to mediate in Afghan-Pak conflict)
മേഖലയിലെ സുരക്ഷ കണക്കിലെടുത്ത് ഇരുരാജ്യങ്ങൾക്കുമിടയിൽ സംഭാഷണം സുഗമമാക്കാൻ ആവശ്യമായ എല്ലാ പിന്തുണയും നൽകാൻ തയ്യാറാണെന്ന് ഇറാൻ വ്യക്തമാക്കി. പിരിമുറുക്കം കുറയ്ക്കുന്നതിനെക്കുറിച്ച് സൗദി വിദേശകാര്യ മന്ത്രി ഫൈസൽ ബിൻ ഫർഹാൻ അൽ സൗദ്, പാകിസ്ഥാൻ വിദേശകാര്യ മന്ത്രി ഇഷാഖ് ദാറുമായി ചർച്ച നടത്തി. നിലവിൽ ഔദ്യോഗിക സന്ദർശനത്തിനായി സൗദിയിലുള്ള ഇഷാഖ് ദാറുമായി നടത്തിയ കൂടിക്കാഴ്ചയിൽ മേഖലയിലെ സ്ഥിരതയ്ക്കായി സൗദി മധ്യസ്ഥത വഹിക്കാനുള്ള സന്നദ്ധത അറിയിച്ചു.
അഫ്ഗാനിസ്ഥാനിലെ കാബൂൾ, കാണ്ഡഹാർ, പക്തിക എന്നിവിടങ്ങളിൽ പാകിസ്ഥാൻ സൈന്യം നടത്തിയ വ്യോമാക്രമണമാണ് നിലവിലെ സംഘർഷത്തിന് കാരണം. ആക്രമണത്തിൽ ഏകദേശം 133 താലിബാൻ ഭീകരർ കൊല്ലപ്പെട്ടതായി പാക് മാധ്യമങ്ങൾ റിപ്പോർട്ട് ചെയ്തു. താലിബാൻ ഭരണകൂടമാണ് ശത്രുതയ്ക്ക് തുടക്കമിട്ടതെന്നും ഏറ്റുമുട്ടലുകളെക്കുറിച്ച് തെറ്റായ വിവരങ്ങൾ പ്രചരിപ്പിക്കുകയാണെന്നും പാക് ഇൻഫർമേഷൻ മന്ത്രി അത്തൗള്ള തരാർ ആരോപിച്ചു.
