ഖാർത്തൂം: സുഡാനിലെ നോർത്ത് ദർഫൂർ സംസ്ഥാനത്തുള്ള മിസ്തേരിഹ നഗരത്തിൽ പാരാമിലിറ്ററി വിഭാഗമായ റാപ്പിഡ് സപ്പോർട്ട് ഫോഴ്സ് (RSF) നടത്തിയ ആക്രമണത്തിൽ 28 പേർ കൊല്ലപ്പെട്ടു (Sudan RSF Military Raid). ഗോത്ര നേതാവ് മൂസ ഹിലാലിന്റെ കേന്ദ്രം ലക്ഷ്യമിട്ട് നടത്തിയ നീക്കത്തിൽ 10 സ്ത്രീകളടക്കം 39 പേർക്ക് പരിക്കേറ്റതായി സുഡാൻ ഡോക്ടേഴ്സ് നെറ്റ്വർക്ക് അറിയിച്ചു. മേഖലയിലെ ഏക ആരോഗ്യ കേന്ദ്രം ആക്രമണത്തിൽ പൂർണ്ണമായും തകർന്നു.
ഗോത്രങ്ങൾ തമ്മിലുള്ള സംഘർഷം രൂക്ഷമായ ദർഫൂർ മേഖലയിൽ തങ്ങളുടെ ആധിപത്യം ഉറപ്പിക്കാനാണ് ആർ.എസ്.എഫ്. ഈ നീക്കം നടത്തിയത്. സർക്കാരിനെ പിന്തുണയ്ക്കുന്ന നിലപാട് സ്വീകരിച്ച ഗോത്ര നേതാവ് മൂസ ഹിലാലിന്റെ വസതിക്ക് നേരെ ഡ്രോൺ ആക്രമണം നടത്തിയ ശേഷമായിരുന്നു കരയാക്രമണം. ആക്രമണത്തെത്തുടർന്ന് നഗരത്തിലെ നിരവധി വീടുകൾക്ക് തീയിട്ടതായും നൂറുകണക്കിന് ആളുകൾ അയൽ ഗ്രാമങ്ങളിലേക്ക് പാലായനം ചെയ്തതായും റിപ്പോർട്ടുകളുണ്ട്. ആർ.എസ്.എഫിന്റെ നടപടികൾ അന്താരാഷ്ട്ര നിയമങ്ങളുടെ ലംഘനമാണെന്ന് മനുഷ്യാവകാശ സംഘടനകൾ ചൂണ്ടിക്കാട്ടി.
2023 ഏപ്രിലിൽ ആഭ്യന്തരയുദ്ധം ആരംഭിച്ചത് മുതൽ ദർഫൂർ മേഖലയിൽ വംശീയ സംഘർഷങ്ങൾ രൂക്ഷമാണ്. ഇതിനോടകം കോടിക്കണക്കിന് ആളുകളെ ബാധിച്ച ഈ യുദ്ധം ലോകത്തിലെ ഏറ്റവും വലിയ മാനുഷിക പ്രതിസന്ധികളിലൊന്നായി മാറിയിരിക്കുകയാണ്. കഴിഞ്ഞ വർഷം ഒക്ടോബറിൽ നോർത്ത് ദർഫൂർ തലസ്ഥാനമായ എൽ-ഫാഷർ പിടിച്ചെടുത്തതിന് പിന്നാലെ ആർ.എസ്.എഫ്. നടത്തുന്ന ഏറ്റവും വലിയ സൈനിക നീക്കങ്ങളിൽ ഒന്നാണിത്. ആരോഗ്യ പ്രവർത്തകർക്ക് നേരെ നടന്ന അക്രമങ്ങളെ അന്താരാഷ്ട്ര സമൂഹം ശക്തമായി അപലപിച്ചു.
Summary: At least 28 people were killed in a large-scale assault by Sudan’s Rapid Support Forces (RSF) on the town of Misteriha in North Darfur.
