കൊളംബോ: 2019-ൽ ശ്രീലങ്കയെ നടുക്കിയ ഈസ്റ്റർ സൺഡേ ഭീകരാക്രമണങ്ങൾക്ക് രാജ്യത്തെ മുൻ രഹസ്യാന്വേഷണ മേധാവി നേരിട്ട് നിർദേശം നൽകിയിരുന്നുവെന്ന ഗുരുതര ആരോപണവുമായി ശ്രീലങ്കൻ സർക്കാർ (Sri Lanka Easter Bombing Investigation). ആക്രമണത്തിൽ 279 പേർ കൊല്ലപ്പെട്ട സംഭവവുമായി ബന്ധപ്പെട്ട് ആദ്യമായാണ് ഇത്തരമൊരു ഔദ്യോഗിക പരാമർശം പാർലമെന്റിൽ ഉയരുന്നത്.
പൊതുസുരക്ഷാ മന്ത്രി ആനന്ദ വിജയപാലയാണ് പാർലമെന്റിൽ ഈ വെളിപ്പെടുത്തൽ നടത്തിയത്. മുൻ സ്റ്റേറ്റ് ഇന്റലിജൻസ് സർവീസ് (SIS) മേധാവിയും വിരമിച്ച മേജർ ജനറലുമായ തുവാൻ സുരേഷ് സല്ലായ് ആക്രമണത്തിന് മുമ്പ് ചില മുസ്ലിം യുവാക്കളുമായി കൂടിക്കാഴ്ച നടത്തി ലക്ഷ്യമിടേണ്ട പള്ളിയെക്കുറിച്ചുള്ള വിവരങ്ങൾ ശേഖരിച്ചിരുന്നുവെന്നാണ് അന്വേഷണത്തിൽ കണ്ടെത്തിയതെന്ന് മന്ത്രി പറഞ്ഞു.
മൂന്ന് ആഡംബര ഹോട്ടലുകളും രണ്ട് കത്തോലിക്കാ ദേവാലയങ്ങളും കൊളംബോയ്ക്ക് പുറത്തുള്ള ഒരു പ്രൊട്ടസ്റ്റന്റ് സഭയും ലക്ഷ്യമാക്കിയായിരുന്നു 2019 ഏപ്രിൽ 21-ന് നടന്ന സ്ഫോടന പരമ്പര. ശ്രീലങ്കയുടെ ചരിത്രത്തിലെ ഏറ്റവും വലിയ ഭീകരാക്രമണങ്ങളിലൊന്നായി ഇത് രേഖപ്പെടുത്തിയിട്ടുണ്ട്.
ഇസ്ലാമിക തീവ്രവാദികളുമായി ഗൂഢാലോചന നടത്തുകയും ആക്രമണം നടപ്പിലാക്കുന്നതുവരെ അവരെ തന്ത്രപരമായി നയിക്കുകയും ചെയ്തതായി അന്വേഷണത്തിൽ വ്യക്തമായതായി മന്ത്രി അവകാശപ്പെട്ടു. എന്നാൽ എല്ലാ ആരോപണങ്ങളും സുരേഷ് സല്ലായ് നിഷേധിച്ചിട്ടുണ്ട്.
ഭീകരവിരുദ്ധ നിയമപ്രകാരം ഫെബ്രുവരിയിൽ അറസ്റ്റിലായ സല്ലായ് കസ്റ്റഡിയിൽ കഴിയുന്നതിനിടെ നിരാഹാര സമരം ആരംഭിച്ചതിനെ തുടർന്ന് കഴിഞ്ഞ ഞായറാഴ്ച ആശുപത്രിയിൽ പ്രവേശിപ്പിച്ചതായും മന്ത്രി അറിയിച്ചു.
സല്ലായിയുടെ ചോദ്യം ചെയ്യലിന് പിന്നാലെ മുൻ പ്രസിഡന്റ് ഗോടബയ രാജപക്സയ്ക്ക് രാജ്യം വിടുന്നതിൽ നിന്ന് വിലക്ക് ഏർപ്പെടുത്തി കോടതി ഉത്തരവ് നേടിയതായും റിപ്പോർട്ടുകളുണ്ട്. 2019-ൽ രാജപക്സ അധികാരത്തിലെത്തിയതിന് പിന്നാലെയാണ് സല്ലായ് സ്റ്റേറ്റ് ഇന്റലിജൻസ് സർവീസിന്റെ തലവനായി നിയമിതനായത്. 2023-ൽ ബ്രിട്ടീഷ് മാധ്യമമായ ചാനൽ 4 പുറത്തുവിട്ട അന്വേഷണ റിപ്പോർട്ടിലും സല്ലായിയും ആക്രമണം നടത്തിയ ഇസ്ലാമിക തീവ്രവാദികളും തമ്മിൽ ബന്ധമുണ്ടെന്ന ആരോപണം ഉയർന്നിരുന്നു. അന്നത്തെ പ്രസിഡന്റ് തിരഞ്ഞെടുപ്പിൽ ഗോടബയ രാജപക്സയ്ക്ക് രാഷ്ട്രീയ നേട്ടമുണ്ടാക്കുന്നതിനായാണ് ആക്രമണം തടയാതിരുന്നതെന്ന വെളിപ്പെടുത്തലും റിപ്പോർട്ടിൽ ഉണ്ടായിരുന്നു.
ഈസ്റ്റർ സ്ഫോടനത്തിന് രണ്ട് ദിവസങ്ങൾക്കുശേഷമാണ് ഗോടബയ രാജപക്സ പ്രസിഡന്റ് സ്ഥാനാർഥിത്വം പ്രഖ്യാപിച്ചത്. ഇസ്ലാമിക തീവ്രവാദത്തെ ശക്തമായി നേരിടുമെന്ന വാഗ്ദാനവുമായി അദ്ദേഹം പിന്നീട് നടന്ന തിരഞ്ഞെടുപ്പിൽ വൻ വിജയം നേടിയിരുന്നു. അതേസമയം, മുൻ പ്രസിഡന്റ് ഗോടബയ രാജപക്സയെ ഇതുവരെ പ്രതിപ്പട്ടികയിൽ ഉൾപ്പെടുത്തിയിട്ടില്ലെങ്കിലും ഉടൻ ചോദ്യം ചെയ്യാൻ സാധ്യതയുണ്ടെന്നാണ് അന്വേഷണ വൃത്തങ്ങൾ നൽകുന്ന സൂചന.
Summary: Sri Lanka’s Public Security Minister has alleged in parliament that former intelligence chief Tuan Suresh Sallay played a direct role in orchestrating the 2019 Easter Sunday bombings that killed 279 people. The revelation comes amid an ongoing investigation, with authorities also examining possible links to former President Gotabaya Rajapaksa.
