മോസ്കോ: റഷ്യൻ സൈന്യത്തിലെ നിർണ്ണായക ചുമതല വഹിച്ചിരുന്ന കേണൽ ദാമീർ ദാവോദവ് (57) കാർ ബോംബ് സ്ഫോടനത്തിൽ കൊല്ലപ്പെട്ടു. മോസ്കോയ്ക്ക് സമീപമുള്ള ബാലാശിഖ നഗരത്തിൽ ചൊവ്വാഴ്ച പുലർച്ചെ 5.30-ഓടെയായിരുന്നു സംഭവം. ദാവോദവ് സഞ്ചരിച്ചിരുന്ന ബിഎംഡബ്ല്യു കാറിനടിയിൽ ഒളിപ്പിച്ചുവെച്ചിരുന്ന സ്ഫോടകവസ്തു പൊട്ടിത്തെറിക്കുകയായിരുന്നു.(Senior Russian Military Official Killed In Car Bombing Near Moscow)
റഷ്യൻ സൈന്യത്തിന്റെ പീരങ്കി, മിസൈൽ വെടിമരുന്ന് വിതരണ വിഭാഗത്തിന്റെ തലവനായിരുന്നു ദാവോദവ്. സ്ഫോടനത്തിൽ കാർ പൂർണ്ണമായും കത്തിയമർന്നു. സ്ഫോടനത്തെത്തുടർന്ന് കാർ നിയന്ത്രണം വിട്ട് സമീപത്ത് പാർക്ക് ചെയ്തിരുന്ന മറ്റൊരു വാഹനത്തിൽ ഇടിക്കുകയായിരുന്നു. സമീപത്തുണ്ടായിരുന്നവർ ദാവോദവിനെ പുറത്തെടുക്കാൻ ശ്രമിച്ചെങ്കിലും ഗുരുതരമായി പൊള്ളലേറ്റ അദ്ദേഹം അധികം വൈകാതെ മരണപ്പെടുകയായിരുന്നു.
സംഭവം നടന്നതായി ക്രെംലിൻ സ്ഥിരീകരിച്ചു. പ്രസിഡന്റ് വ്ലാദിമിർ പുടിനെ വിവരങ്ങൾ അറിയിച്ചിട്ടുണ്ടെങ്കിലും അന്വേഷണത്തെക്കുറിച്ചുള്ള കൂടുതൽ വിവരങ്ങൾ വെളിപ്പെടുത്താൻ ക്രെംലിൻ വക്താവ് ദിമിത്രി പെസ്കോവ് തയ്യാറായില്ല. ഉക്രെയ്ൻ യുദ്ധം ആരംഭിച്ചതിന് ശേഷം റഷ്യൻ സൈനിക ഉദ്യോഗസ്ഥരെയും യുദ്ധത്തെ അനുകൂലിക്കുന്ന പ്രമുഖരെയും ലക്ഷ്യമാക്കി നടക്കുന്ന നിരവധി ആക്രമണങ്ങളിൽ ഒടുവിലത്തേതാണിത്.
ഈ സംഭവത്തിൽ ഉക്രെയ്ൻ ഇതുവരെ ഔദ്യോഗികമായി പ്രതികരിച്ചിട്ടില്ല. എന്നിരുന്നാലും, റഷ്യൻ നിയമസഭാംഗവും വിരമിച്ച ജനറലുമായ വ്ലാദിമിർ ഷാമനോവ് ആക്രമണത്തെ അപലപിക്കുകയും തിരിച്ചടി നൽകുമെന്ന് സൂചന നൽകുകയും ചെയ്തു. റഷ്യയുടെ ആഭ്യന്തര സുരക്ഷാ സംവിധാനങ്ങളുടെ വീഴ്ചയിലേക്കാണ് ഈ സംഭവം വിരൽ ചൂണ്ടുന്നത്. കഴിഞ്ഞ വർഷം ഇതേ പ്രദേശത്ത് നിന്ന് ഒരു മൈൽ അകലെ വെച്ച് മറ്റൊരു സൈനിക ഉന്നത ഉദ്യോഗസ്ഥനായ ലഫ്റ്റനന്റ് ജനറൽ യാരോസ്ലാവ് മോസ്കാലിക്കും സമാനമായ രീതിയിൽ കൊല്ലപ്പെട്ടിരുന്നു. ഇതിന് പുറമെ മോസ്കോയിൽ മറ്റൊരു ശാസ്ത്ര-വ്യാവസായിക സ്ഥാപനത്തിലെ ജീവനക്കാരനെ വധിക്കാൻ ശ്രമിച്ചെന്ന റിപ്പോർട്ടും പുറത്തുവരുന്നുണ്ട്. റഷ്യക്കുള്ളിൽ ഉക്രെയ്ൻ രഹസ്യാന്വേഷണ ഏജൻസികളുടെ ശൃംഖലകൾ സജീവമാണെന്നതിന്റെ സൂചനയായാണ് ഈ ആക്രമണങ്ങളെ നിരീക്ഷകർ കാണുന്നത്.
Story Summary
A senior Russian military official, Col. Damir Davydov, was killed in a targeted car bombing near Moscow. The 57-year-old, who oversaw weapons logistics for the Russian military, died after an explosive device detonated under his vehicle, marking the latest in a series of attacks on high-profile Russian figures since the invasion of Ukraine.
