റിയാദ്: ആഫ്രിക്കൻ രാജ്യങ്ങളിൽ എബോള (Saudi Arabia travel ban Ebola) വൈറസ് ബാധ വീണ്ടും പടർന്നുപിടിക്കുന്ന സാഹചര്യത്തിൽ അതീവ മുൻകരുതൽ നടപടികളുമായി സൗദി അറേബ്യ. രോഗവ്യാപന സാധ്യതകൾ പൂർണ്ണമായും ഇല്ലാതാക്കുന്നതിന്റെ ഭാഗമായി മൂന്ന് ആഫ്രിക്കൻ രാജ്യങ്ങളിൽ നിന്നുള്ളവർക്ക് സൗദി അറേബ്യ താൽക്കാലിക പ്രവേശന വിലക്കേർപ്പെടുത്തി. ഒപ്പം സൗദി പൗരന്മാർക്ക് ഇവിടങ്ങളിലേക്ക് യാത്രാവിലക്കും ഏർപ്പെടുത്തിയിട്ടുണ്ട്.
കോംഗോ, ഉഗാണ്ട, ദക്ഷിണ സുഡാൻ എന്നീ രാജ്യങ്ങൾക്കാണ് സൗദി അറേബ്യ നിലവിൽ താൽക്കാലിക വിലക്ക് പ്രഖ്യാപിച്ചിരിക്കുന്നത്. ഈ രാജ്യങ്ങളിൽ നിന്നുള്ളവർക്ക് റീ-എൻട്രി ഉൾപ്പെടെ എല്ലാത്തരം വിസകളും അനുവദിക്കുന്നത് സൗദി താൽക്കാലികമായി നിർത്തിവെച്ചു. കൂടാതെ, മറ്റ് രാജ്യങ്ങൾ വഴി വരുന്ന ട്രാൻസിറ്റ് (Transit) യാത്രക്കാരാണെങ്കിൽ പോലും, സൗദിയിൽ എത്തുന്നതിന് തൊട്ടുമുമ്പുള്ള 21 ദിവസത്തിനിടെ ഈ മൂന്ന് രാജ്യങ്ങളിൽ ഏതെങ്കിലും ഒന്നിൽ സന്ദർശനം നടത്തുകയോ താമസിക്കുകയോ ചെയ്തവർക്കും ഈ പ്രവേശന വിലക്ക് പൂർണ്ണമായി ബാധകമായിരിക്കും.
പ്രവേശന കവാടങ്ങളിൽ കർശന പരിശോധന; നിരീക്ഷണം ശക്തം
സൗദിയിലെ പൗരന്മാർ, പ്രവാസികൾ, സന്ദർശകർ എന്നിവരുടെ പൊതുജനാരോഗ്യം ഉറപ്പാക്കുന്നതിനായി ആഭ്യന്തര-അന്തർദേശീയ ആരോഗ്യ സുരക്ഷാ ഏജൻസികളുമായി ചേർന്ന് നിരീക്ഷണ-പ്രതികരണ സംവിധാനങ്ങൾ സജീവമാക്കിയിട്ടുണ്ടെന്ന് സൗദി ആരോഗ്യവകുപ്പ് അറിയിച്ചു. നേരത്തെ തന്നെ എബോള രോഗബാധ റിപ്പോർട്ട് ചെയ്ത റുവാണ്ട, ബുറുണ്ടി, ടാൻസാനിയ, കോംഗോ (ബ്രാസാവില്ലെ) എന്നീ അയൽരാജ്യങ്ങളിൽ നിന്ന് വരുന്നവർക്കായി വിമാനത്താവളങ്ങൾ ഉൾപ്പെടെയുള്ള അതിർത്തികളിലെ പ്രവേശന കവാടങ്ങളിൽ വിപുലമായ പരിശോധനാ നടപടിക്രമങ്ങളും പ്രത്യേക ആരോഗ്യ നിരീക്ഷണ സംവിധാനങ്ങളും സൗദി ആരോഗ്യ മന്ത്രാലയം കർശനമാക്കിയിട്ടുണ്ട്.
നിലവിൽ സൗദി അറേബ്യയിലെ പൊതുജനാരോഗ്യ സാഹചര്യം പൂർണ്ണമായും സുരക്ഷിതമാണെന്ന് പൊതുജനാരോഗ്യ അതോറിറ്റിയായ ‘വിഖായ’ (Weqaya) വ്യക്തമാക്കി. പുതിയ മുൻകരുതൽ നടപടികൾ നടപ്പാക്കിയതിനുശേഷം സൗദിയിൽ എവിടെയും എബോള സ്ഥിരീകരിച്ചതോ അല്ലെങ്കിൽ രോഗലക്ഷണങ്ങളോടെ സംശയിക്കപ്പെടുന്നതോ ആയ കേസുകളൊന്നും ഇതുവരെ റിപ്പോർട്ട് ചെയ്തിട്ടില്ല. ലോകാരോഗ്യ സംഘടനയുടെ (WHO) നിർദ്ദേശപ്രകാരം പൊതുജനാരോഗ്യം സംരക്ഷിക്കുന്നതിനും രോഗങ്ങൾ പകരുന്നത് തടയുന്നതിനുമുള്ള നിരന്തരമായ ശ്രമങ്ങളുടെ ഭാഗമായി സ്വീകരിക്കുന്ന ഒരു സാധാരണ പ്രതിരോധ നടപടി മാത്രമാണിതെന്നും അതോറിറ്റി കൂട്ടിച്ചേർത്തു.
ആഗോളതലത്തിലും പ്രാദേശിക തലത്തിലും പകർച്ചവ്യാധികളുമായി ബന്ധപ്പെട്ട വിവരങ്ങൾ 24 മണിക്കൂറും നിരീക്ഷിച്ചുവരികയാണ്. വികസിച്ചുകൊണ്ടിരിക്കുന്ന ആരോഗ്യ സാഹചര്യങ്ങൾ സൂക്ഷ്മമായി വിലയിരുത്തി വരും ദിവസങ്ങളിൽ ആവശ്യമായ കൂടുതൽ മാറ്റങ്ങളും ശുപാർശകളും ബന്ധപ്പെട്ട അധികാരികളുമായി ഏകോപിപ്പിച്ച് നടപ്പിലാക്കുമെന്നും വിഖായ വ്യക്തമാക്കി.
Story Summary: Saudi Arabia has imposed a temporary entry ban on travelers from Congo, Uganda, and South Sudan due to an Ebola outbreak. The Public Health Authority ‘Weqaya’ stated that the restrictions, which include a 21-day quarantine rule for transit travelers, are precautionary and no cases have been reported in the Kingdom.
