വാഷിംഗ്ടൺ: അമേരിക്കയിൽ ഇമിഗ്രേഷൻ ഉദ്യോഗസ്ഥർ തടവിലാക്കിയ അഞ്ചുവയസ്സുകാരൻ ലിയാം കൊനെജോ റാമോസും പിതാവ് അഡ്രിയാൻ കൊനെജോയും മിനസോട്ടയിലെ വീട്ടിൽ തിരിച്ചെത്തി (ICE Released Liam Conejo Ramos). ടെക്സാസിലെ ഡിറ്റൻഷൻ സെന്ററിൽ കഴിഞ്ഞിരുന്ന ഇവരെ വിട്ടയക്കാൻ ഫെഡറൽ ജഡ്ജി ഉത്തരവിട്ടതിനെത്തുടർന്നാണ് മടക്കം. ടെക്സാസിൽ നിന്നുള്ള ഡെമോക്രാറ്റിക് പ്രതിനിധി ജോക്വിൻ കാസ്ട്രോ ശനിയാഴ്ച രാത്രി ഇവരെ നേരിട്ടെത്തി സ്വീകരിക്കുകയും മിനസോട്ടയിലേക്ക് അനുഗമിക്കുകയും ചെയ്തു. മിനസോട്ടയിൽ നടന്ന റെയ്ഡിനിടെ നാല് വിദ്യാർത്ഥികളെ ഉദ്യോഗസ്ഥർ പിടികൂടിയിരുന്നു, ഇതിൽ ഉൾപ്പെട്ട ലിയാമിന്റെ ചിത്രം അന്താരാഷ്ട്ര തലത്തിൽ വലിയ ചർച്ചയായിരുന്നു.
അഭയാർത്ഥികളായി നിയമപരമായി അമേരിക്കയിൽ പ്രവേശിച്ച പിതാവിനെയും മകനെയും തടവിലാക്കിയ സർക്കാർ നടപടിയെ യുഎസ് ജില്ലാ ജഡ്ജി ഫ്രെഡ് ബിയേരി രൂക്ഷമായി വിമർശിച്ചു. നാടുകടത്തൽ ക്വോട്ട തികയ്ക്കാനുള്ള സർക്കാരിന്റെ കഴിവുകേടും കെടുകാര്യസ്ഥതയുമാണ് ഈ സംഭവത്തിലൂടെ വെളിവായതെന്നും ഇത് കുട്ടികളെ മാനസികമായി തകർക്കുന്നതാണെന്നും അദ്ദേഹം നിരീക്ഷിച്ചു. ഐസിഇ ഏജന്റുമാർ മിനസോട്ടയിൽ നടത്തിയ വെടിവെപ്പും കുട്ടികളെ തടവിലാക്കിയതും വലിയ പ്രതിഷേധങ്ങൾക്ക് കാരണമായിട്ടുണ്ട്. ഇമിഗ്രേഷൻ ഏജന്റുമാർക്ക് ബോഡി ക്യാമറകൾ നിർബന്ധമാക്കണമെന്നും മാസ്ക് ധരിച്ചുള്ള പരിശോധനകൾ അവസാനിപ്പിക്കണമെന്നും ഡെമോക്രാറ്റുകൾ ആവശ്യപ്പെട്ടു.
Summary
Five-year-old Liam Conejo Ramos and his father returned to Minnesota after a federal judge ordered their release from an ICE detention facility in Texas. Judge Fred Biery slammed the government’s pursuit of deportation quotas as “ill-conceived,” while Democrats called for urgent reforms following controversial ICE operations and shootings in Minneapolis.
