പെർത്ത്: പടിഞ്ഞാറൻ ഓസ്ട്രേലിയയിലെ പ്രശസ്തമായ വിനോദസഞ്ചാര കേന്ദ്രത്തിന് സമീപം ഉണ്ടായ സ്രാവ് ആക്രമണത്തിൽ 38-കാരൻ കൊല്ലപ്പെട്ടു (Great White Shark Attack Australia). പെർത്ത് നഗരത്തിന് പടിഞ്ഞാറുള്ള റോട്ട്നെസ്റ്റ് ദ്വീപിന് സമീപം ശനിയാഴ്ച പ്രാദേശിക സമയം രാവിലെ പത്ത് മണിയോടെയാണ് അപകടം സംഭവിക്കുന്നത്. ജനപ്രിയ ഡൈവിംഗ്, ഫിഷിംഗ് കേന്ദ്രമായ ‘ഹോഴ്സ്ഷൂ റീഫിന്’ സമീപം വെച്ചാണ് യുവാവിന് സ്രാവിന്റെ കടിയേറ്റതെന്ന് വെസ്റ്റേൺ ഓസ്ട്രേലിയൻ പോലീസ് പ്രസ്താവനയിൽ അറിയിച്ചു.
ആക്രമണത്തിന് ഇരയായ യുവാവിനെ ഉടൻ തന്നെ ബോട്ടിൽ ജോർഡി ബേ ജെട്ടിയിൽ എത്തിച്ച് പാരാമെഡിക്കൽ ജീവനക്കാരും പോലീസും സിപിയാർ ഉൾപ്പെടെയുള്ള അടിയന്തര രക്ഷാപ്രവർത്തനങ്ങൾ നൽകിയെങ്കിലും ജീവൻ രക്ഷിക്കാനായില്ല. അദ്ദേഹം സംഭവസ്ഥലത്തുതന്നെ മരണപ്പെടുകയായിരുന്നു. യുവാവിനെ ആക്രമിച്ച ഗ്രേറ്റ് വൈറ്റ് ഇനത്തിൽപ്പെട്ട സ്രാവിന് ഏകദേശം നാല് മീറ്റർ (13 അടി) നീളമുണ്ടായിരുന്നതായി ഡിപ്പാർട്ട്മെന്റ് ഓഫ് പ്രൈമറി ഇൻഡസ്ട്രീസ് ആൻഡ് റീജിയണൽ ഡെവലപ്മെന്റ് സ്ഥിരീകരിച്ചു. കഴിഞ്ഞ വർഷം മാർച്ചിൽ വാർട്ടൺ ബീച്ചിലുണ്ടായ അപകടത്തിന് ശേഷം പടിഞ്ഞാറൻ ഓസ്ട്രേലിയയിൽ റിപ്പോർട്ട് ചെയ്യപ്പെടുന്ന ആദ്യത്തെ മാരകമായ സ്രാവ് ആക്രമണമാണിത്. ഓസ്ട്രേലിയയുടെ കിഴക്കൻ, തെക്കുകിഴക്കൻ തീരങ്ങളിൽ സ്രാവ് ആക്രമണങ്ങൾ പതിവാണെന്നും പ്രതിവർഷം ശരാശരി 20 ഓളം ഇത്തരം സംഭവങ്ങൾ രാജ്യത്ത് റിപ്പോർട്ട് ചെയ്യപ്പെടാറുണ്ടെന്നും ഓസ്ട്രേലിയൻ ഇൻസ്റ്റിറ്റ്യൂട്ട് ഓഫ് ഹെൽത്ത് ആൻഡ് വെൽഫെയറിന്റെ കണക്കുകൾ വ്യക്തമാക്കുന്നു.
Summary: A 38-year-old man died after being attacked by a four-meter (13-foot) great white shark off Rottnest Island, near Perth in Western Australia. The incident occurred around 10 am local time on Saturday at a popular diving and fishing spot known as Horseshoe Reef. Despite emergency rescue efforts and CPR performed by paramedics at the Geordie Bay Jetty, the victim succumbed to his injuries at the scene, marking the first fatal shark attack in Western Australia since March of last year.
