ഗാസ സിറ്റി: വെടിനിർത്തൽ പ്രഖ്യാപനങ്ങൾക്ക് ശേഷവും ഗാസയിൽ ഇസ്രായേൽ തുടരുന്ന ആക്രമണങ്ങളിൽ മൂന്ന് കമ്മ്യൂണിറ്റി കിച്ചൻ (സാമൂഹിക അടുക്കള) ജീവനക്കാരുൾപ്പെടെ എട്ട് ഫലസ്തീനികൾ കൂടി കൊല്ലപ്പെട്ടു (Gaza Israel Air Strike). മധ്യ ഗാസയിലെ ദേർ അൽ-ബലാ, ഖാൻ യൂനിസ്, ബെയ്ത് ലാഹിയ എന്നിവിടങ്ങളിലാണ് ഞായറാഴ്ച ഇസ്രായേൽ ശക്തമായ വ്യോമാക്രമണം നടത്തിയത്. ജനങ്ങൾക്ക് ഭക്ഷണം എത്തിച്ചുനൽകിയിരുന്ന കമ്മ്യൂണിറ്റി കിച്ചൻ ലക്ഷ്യമിട്ടായിരുന്നു ദേർ അൽ-ബലായിലെ ആക്രമണമെന്ന് മാധ്യമങ്ങൾ റിപ്പോർട്ട് ചെയ്തു.
ജനങ്ങളെ മാത്രമല്ല, അവർക്ക് സഹായമെത്തിക്കുന്ന സാമൂഹിക സംഘടനകളെയും ഇസ്രായേൽ ബോധപൂർവ്വം ലക്ഷ്യമിടുന്നു എന്നതിന്റെ തെളിവാണ് ഇതൊക്കെയെന്ന് പ്രാദേശിക മാധ്യമപ്രവർത്തകർ ചൂണ്ടിക്കാട്ടുന്നു. ആക്രമണം ബോധപൂർവ്വമായ യുദ്ധക്കുറ്റമാണെന്നും ഫലസ്തീൻ ജനതയ്ക്ക് നേരെ തുടരുന്ന വംശഹത്യയുടെ ഭാഗമാണെന്നും ഹമാസ് പ്രതികരിച്ചു. അന്താരാഷ്ട്ര സമൂഹത്തിന്റെ നിശ്ശബ്ദതയാണ് ഇത്തരം കൂട്ടക്കൊലകൾ തുടരാൻ ഇസ്രായേലിന് ധൈര്യം നൽകുന്നതെന്നും അവർ കുറ്റപ്പെടുത്തി.
ഗാസ ആരോഗ്യ മന്ത്രാലയത്തിന്റെ ഏറ്റവും പുതിയ കണക്കുകൾ പ്രകാരം, 2023 ഒക്ടോബർ 7-ന് ആരംഭിച്ച ഇസ്രായേൽ ആക്രമണങ്ങളിൽ ഇതുവരെ 72,760-ലധികം ഫലസ്തീനികൾ കൊല്ലപ്പെട്ടിട്ടുണ്ട്. കഴിഞ്ഞ വർഷം ഒക്ടോബറിൽ നിലവിൽ വന്ന വെടിനിർത്തൽ കരാറിന് ശേഷം മാത്രം 871 പേരാണ് ഇസ്രായേൽ ആക്രമണങ്ങളിൽ മരണപ്പെട്ടത്. നിലവിൽ ഗാസയുടെ 60 ശതമാനത്തോളം പ്രദേശം ഇസ്രായേൽ സൈന്യത്തിന്റെ നിയന്ത്രണത്തിലാണ്. ബഫർ സോൺ അതിർത്തിയിൽ വെച്ച് തങ്ങൾക്ക് നേരെ ഭീഷണി ഉയർത്തിയ ഒരാളെ വധിച്ചതായും ഹമാസ് കമാൻഡറായ ബഹ ബറൂദിനെ വധിച്ചതായും ഇസ്രായേൽ സൈന്യം അവകാശപ്പെട്ടു.
Summary: At least eight Palestinians, including three community kitchen workers, were killed in recent Israeli air strikes across the Gaza Strip, targeting locations in Deir el-Balah, Khan Younis, and Beit Lahiya. Hamas condemned the strike on the kitchen as a deliberate war crime and part of an ongoing genocide, slamming international inaction. According to Gaza’s Health Ministry, the death toll since October 2023 has reached 72,760, with at least 871 fatalities recorded since a conditional ceasefire began last year.
