ഹേഗ്: ഫിഫ പ്രസിഡന്റ് ജിയാനി ഇൻഫാന്റിനോ, യുവേഫ പ്രസിഡന്റ് അലക്സാണ്ടർ സെഫെറിൻ എന്നിവർക്കെതിരെ അന്താരാഷ്ട്ര ക്രിമിനൽ കോടതിയിൽ പരാതി (FIFA UEFA Chiefs ICC War Crimes Complaint). പലസ്തീൻ ഫുട്ബോൾ താരങ്ങളും ക്ലബ്ബുകളും മനുഷ്യാവകാശ സംഘടനകളും ചേർന്നാണ് ഈ ചരിത്രപരമായ പരാതി നൽകിയിരിക്കുന്നത്. ഇസ്രായേൽ അധിനിവേശ മേഖലകളിലെ ക്ലബ്ബുകളെ അന്താരാഷ്ട്ര മത്സരങ്ങളിൽ പങ്കെടുക്കാൻ അനുവദിക്കുന്നതിലൂടെ ഇവർ യുദ്ധക്കുറ്റങ്ങൾക്കും വർണ്ണവിവേചനത്തിനും കൂട്ടുനിൽക്കുന്നു എന്നാണ് പ്രധാന ആരോപണം.
ഫെബ്രുവരി 16-ന് സമർപ്പിക്കപ്പെട്ട 120 പേജുള്ള പരാതിയിൽ, ഫിഫയുടെയും യുവേഫയുടെയും തലവന്മാർ വ്യക്തിപരമായി ഈ കുറ്റകൃത്യങ്ങളിൽ പങ്കാളികളാണെന്ന് ആരോപിക്കുന്നു. ഗാസയിലെ സംഘർഷങ്ങളിൽ ഇതിനോടകം 1,007 പലസ്തീൻ കായികതാരങ്ങൾ കൊല്ലപ്പെടുകയും 184 കായിക കേന്ദ്രങ്ങൾ തകർക്കപ്പെടുകയും ചെയ്തിട്ടുണ്ട്. വെസ്റ്റ് ബാങ്കിലെ അനധികൃത ഇസ്രായേൽ കുടിയേറ്റ കേന്ദ്രങ്ങളിൽ നിന്നുള്ള ക്ലബ്ബുകളെ ഇസ്രായേൽ ഫുട്ബോൾ അസോസിയേഷൻ (IFA) തങ്ങളുടെ ലീഗുകളിൽ ഉൾപ്പെടുത്തിയിട്ടുണ്ട്. ഇത് ഫിഫയുടെ തന്നെ നിയമങ്ങൾക്ക് വിരുദ്ധമാണെന്നും പലസ്തീൻ മണ്ണിലെ ഇസ്രായേൽ അധിനിവേശത്തെ സാധൂകരിക്കാനാണ് സ്പോർട്സ് ഗവേണിംഗ് ബോഡികൾ ശ്രമിക്കുന്നതെന്നും പരാതിയിൽ പറയുന്നു.
റഷ്യയുടെ യുക്രെയ്ൻ അധിനിവേശത്തെത്തുടർന്ന് റഷ്യൻ ടീമുകളെ വിലക്കിയ ഫിഫ, ഇസ്രായേലിന്റെ കാര്യത്തിൽ ഇരട്ടത്താപ്പാണ് കാണിക്കുന്നതെന്ന് വിമർശകർ ചൂണ്ടിക്കാട്ടുന്നു. എന്നാൽ രാഷ്ട്രീയ കാരണങ്ങളാൽ രാജ്യങ്ങളെ വിലക്കുന്നതിനോട് തനിക്ക് യോജിപ്പില്ലെന്നാണ് ഇൻഫാന്റിനോയുടെ നിലപാട്. ഐ.സി.സി. ഈ പരാതിയിന്മേൽ പ്രാഥമികാന്വേഷണം ആരംഭിക്കും. കുറ്റാരോപണങ്ങൾ ശരിയാണെന്ന് കണ്ടാൽ ഫിഫ, യുവേഫ തലവന്മാർക്കെതിരെ അറസ്റ്റ് വാറണ്ട് വരെ പുറപ്പെടുവിക്കാൻ കോടതിക്ക് അധികാരമുണ്ട്. കായികരംഗത്തെ ഉന്നത ഉദ്യോഗസ്ഥർക്കെതിരെ ഇത്തരം ഗുരുതരമായ ആരോപണങ്ങൾ ഉയരുന്നത് ഇതാദ്യമായാണ്.
Summary: In a landmark legal action, a coalition of Palestinian footballers has filed a complaint at the ICC against the presidents of FIFA and UEFA.
