വാഷിംഗ്ടൺ: തന്റെ മൂത്ത മകൻ ഡൊണാൾഡ് ട്രംപ് ജൂനിയറിന്റെ വിവാഹത്തിൽ പങ്കെടുക്കാൻ പരമാവധി ശ്രമിക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ്. എന്നാൽ ഇറാനുമായുള്ള യുദ്ധം കൊടുമ്പിരിക്കൊണ്ടിരിക്കുന്ന നിലവിലെ സാഹചര്യത്തിൽ വിവാഹത്തിൽ പങ്കെടുക്കാനുള്ള സമയം കണ്ടെത്തുക ബുദ്ധിമുട്ടാണെന്ന് അദ്ദേഹം മാധ്യമങ്ങളോട് തുറന്നു സമ്മതിച്ചു.(Donald Trump Might Skip Son Donald Trump Jr Wedding In Bahamas Due To Iran War)
48-കാരനായ ഡൊണാൾഡ് ട്രംപ് ജൂനിയറും മോഡലും സോഷ്യലൈറ്റുമായ ബെറ്റിന ആൻഡേഴ്സണും തമ്മിലുള്ള വിവാഹം ഈ വാരാന്ത്യത്തിൽ ബഹാമാസിലെ ഒരു സ്വകാര്യ ദ്വീപിൽ വെച്ച് നടക്കുമെന്നാണ് യുഎസ് മാധ്യമങ്ങൾ റിപ്പോർട്ട് ചെയ്യുന്നത്. ട്രംപ് ജൂനിയറിന്റെ രണ്ടാം വിവാഹമാണിത്. തന്റെ വിവാഹച്ചടങ്ങിൽ പിതാവ് പങ്കെടുക്കണമെന്ന് മകൻ ആഗ്രഹിക്കുന്നുണ്ടെങ്കിലും, പശ്ചിമേഷ്യൻ പ്രതിസന്ധിയും മറ്റ് അടിയന്തര ഭരണപരമായ കാര്യങ്ങളും കാരണം തനിക്ക് പോകാൻ സാധിക്കുമോ എന്ന് ഉറപ്പില്ലെന്ന് ഓവൽ ഓഫീസിൽ വെച്ച് ട്രംപ് മാധ്യമപ്രവർത്തകരോട് പറഞ്ഞു.
“ഞാൻ അവിടെ വരണമെന്ന് അവൻ ആഗ്രഹിക്കുന്നുണ്ട്. വളരെ ചെറിയൊരു സ്വകാര്യ ചടങ്ങാണ് അത്. പങ്കെടുക്കാൻ ഞാൻ പരമാവധി ശ്രമിക്കും. എങ്കിലും, ഞാൻ അവനോട് പറഞ്ഞു, ‘ഇത് എനിക്ക് പറ്റിയ സമയമല്ല. എനിക്ക് ഇറാൻ എന്ന് പറയുന്ന ഒരു വിഷയവും മറ്റ് ചില കാര്യങ്ങളും കൈകാര്യം ചെയ്യാനുണ്ട്’ “— ട്രംപ് വ്യക്തമാക്കി. യുദ്ധം തുടരുന്നതിനിടയിൽ താൻ വിവാഹത്തിൽ പങ്കെടുത്താലുണ്ടാകുന്ന രാഷ്ട്രീയ-മാധ്യമ വിമർശനങ്ങളെ ട്രംപ് തന്റെ പതിവ് ശൈലിയിൽ പരിഹസിക്കുകയും ചെയ്തു.
“ഇതിൽ എനിക്ക് ജയിക്കാൻ കഴിയില്ല. ഞാൻ വിവാഹത്തിൽ പങ്കെടുത്താൽ അവർ എന്നെ കൊല്ലും. ഞാൻ പങ്കെടുത്തില്ലെങ്കിലും അവർ എന്നെ കൊല്ലും — തീർച്ചയായും വ്യാജ വാർത്തകൾ നൽകുന്ന മാധ്യമങ്ങളെക്കുറിച്ചാണ് ഞാൻ പറയുന്നത്. എന്തായാലും അവർക്ക് നല്ലൊരു ദാമ്പത്യ ജീവിതം ആശംസിക്കുന്നു,” ട്രംപ് കൂട്ടിച്ചേർത്തു.
Story Summary
US President Donald Trump stated that he would try to attend his eldest son Donald Trump Jr’s private wedding to Bettina Anderson in the Bahamas this weekend. However, he admitted that the timing is difficult due to the ongoing conflict with Iran, jokingly adding that the media would criticize him regardless of his decision.
