ന്യൂയോർക്ക്: ജെഫ്രി എപ്സ്റ്റീനുമായി ബന്ധപ്പെട്ട പുതിയ രേഖകൾ പുറത്തുവന്നതിന് പിന്നാലെ, താൻ എപ്സ്റ്റീനോടൊപ്പം ചെലവഴിച്ച ഓരോ നിമിഷത്തിലും ഖേദിക്കുന്നതായി മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സ് വ്യക്തമാക്കി (Bill Gates apologizes Epstein connection). പുതിയ അമേരിക്കൻ നീതിന്യായ വകുപ്പ് ഫയലുകളിൽ ഗേറ്റ്സിനെതിരെ ഉയർന്നുവന്ന ലൈംഗിക രോഗം (STD) ബാധിച്ചുവെന്നതടക്കമുള്ള ആരോപണങ്ങൾ അദ്ദേഹം പൂർണ്ണമായും നിഷേധിച്ചു. എപ്സ്റ്റീൻ സ്വയം അയച്ച ഇമെയിലുകളിലെ വിവരങ്ങൾ വെറും നുണകളാണെന്നും തന്നെ അപകീർത്തിപ്പെടുത്താനായി കെട്ടിച്ചമച്ചതാണെന്നും ഓസ്ട്രേലിയൻ മാധ്യമത്തിന് നൽകിയ അഭിമുഖത്തിൽ ഗേറ്റ്സ് പ്രതികരിച്ചു. ചാരിറ്റി പ്രവർത്തനങ്ങൾക്കായി പണം കണ്ടെത്താനാണ് എപ്സ്റ്റീനെ കണ്ടതെങ്കിലും അത് വലിയൊരു തെറ്റായിപ്പോയെന്ന് അദ്ദേഹം സമ്മതിച്ചു.
അതേസമയം, പുതിയ വെളിപ്പെടുത്തലുകൾ തന്റെ വിവാഹജീവിതത്തിലെ കടുത്ത വേദനകളെ ഓർമ്മിപ്പിക്കുന്നുവെന്ന് മെലിൻഡ ഫ്രഞ്ച് ഗേറ്റ്സ് പറഞ്ഞു. എൻപിആർ പോഡ്കാസ്റ്റിൽ സംസാരിക്കവേയാണ് മെലിൻഡ തന്റെ നിലപാട് വ്യക്തമാക്കിയത്. ബിൽ ഗേറ്റ്സിന് എപ്സ്റ്റീനുമായുണ്ടായിരുന്ന ബന്ധത്തിൽ തനിക്ക് വലിയ വിയോജിപ്പുണ്ടായിരുന്നുവെന്നും ഇത്തരം കാര്യങ്ങൾ പുറത്തുവരുമ്പോൾ താൻ വല്ലാത്ത സങ്കടം അനുഭവിക്കുന്നുണ്ടെന്നും അവർ കൂട്ടിച്ചേർത്തു. ഇത്തരം ആരോപണങ്ങൾക്ക് മറുപടി പറയേണ്ടത് തന്റെ മുൻ ഭർത്താവാണെന്നും താൻ ഇപ്പോൾ ആ പ്രതിസന്ധികളിൽ നിന്ന് മുക്തയാണെന്നും മെലിൻഡ പറഞ്ഞു. 2021-ലാണ് ഇരുവരും 27 വർഷത്തെ ദാമ്പത്യം അവസാനിപ്പിച്ച് വിവാഹമോചിതരായത്.
Summary: Bill Gates expressed regret for his interactions with Jeffrey Epstein, while Melinda Gates said the released files brought back painful memories of their marriage and repeated her concerns about his judgment.
