ബാഗ്ദാദ്: ഇറാഖിലെ ഇറാൻ അനുകൂല സായുധ ഗ്രൂപ്പായ കതൈബ് ഹിസ്ബുള്ളയുടെ സൈനിക താവളത്തിന് നേരെ നടന്ന ബോംബാക്രമണത്തിൽ ചുരുങ്ങിയത് രണ്ട് പോരാളികൾ കൊല്ലപ്പെട്ടു (Attack On Iraq Military Base). തെക്കൻ ഇറാഖിലെ ജർഫ് അൽ സഖർ എന്നറിയപ്പെടുന്ന സൈനിക കേന്ദ്രത്തിന് നേരെയാണ് ആക്രമണമുണ്ടായതെന്ന് സംഘടനാ വൃത്തങ്ങൾ വാർത്താ ഏജൻസിയായ എഎഫ്പിയോട് സ്ഥിരീകരിച്ചു. ആക്രമണത്തിൽ അഞ്ച് പേർക്ക് പരിക്കേറ്റതായും ചില റിപ്പോർട്ടുകൾ പ്രകാരം മരണം മൂന്നായി ഉയരാൻ സാധ്യതയുണ്ടെന്നും സൂചനയുണ്ട്.
ഇറാനിലെ തന്ത്രപ്രധാന കേന്ദ്രങ്ങളിൽ അമേരിക്കയും ഇസ്രായേലും സംയുക്തമായി ‘ഓപ്പറേഷൻ റോർ ഓഫ് ദി ലയൺ’ എന്ന പേരിൽ ആക്രമണം നടത്തുന്നതിനിടെയാണ് ഇറാഖിലെ ഈ നീക്കം. ഇറാന്റെ പ്രാദേശിക സഖ്യകക്ഷികളെ ദുർബലപ്പെടുത്തുക എന്ന ലക്ഷ്യത്തോടെയാണ് ഈ താവളം ലക്ഷ്യം വെച്ചതെന്ന് കരുതപ്പെടുന്നു. കതൈബ് ഹിസ്ബുള്ളയുടെ ആയുധ സംഭരണശാലകളും പരിശീലന കേന്ദ്രങ്ങളും സ്ഥിതി ചെയ്യുന്ന ഇടമാണ് ജർഫ് അൽ സഖർ. ആക്രമണത്തിന് പിന്നാലെ ഇറാഖിലുടനീളം ഇറാൻ അനുകൂല സംഘടനകൾ കനത്ത ജാഗ്രതാ നിർദ്ദേശം പുറപ്പെടുവിച്ചു.
ഇറാഖ് സർക്കാർ ഈ ആക്രമണത്തോട് ഇതുവരെ ഔദ്യോഗികമായി പ്രതികരിച്ചിട്ടില്ലെങ്കിലും ഇറാഖ് വ്യോമപാത ഭാഗികമായി അടച്ചതായി റിപ്പോർട്ടുകളുണ്ട്. പശ്ചിമേഷ്യയിൽ യുദ്ധം വ്യാപിക്കുന്ന സാഹചര്യത്തിൽ സിറിയയിലും ഇറാഖിലുമുള്ള അമേരിക്കൻ വിരുദ്ധ സായുധ ഗ്രൂപ്പുകൾ യുഎസ് താവളങ്ങൾക്ക് നേരെ പ്രത്യാക്രമണം നടത്താൻ സാധ്യതയുണ്ടെന്ന് രാഷ്ട്രീയ നിരീക്ഷകർ കരുതുന്നു. ഇതിനോടകം തന്നെ ഗൾഫ് മേഖലയിലെ പ്രധാന അമേരിക്കൻ സൈനിക കേന്ദ്രങ്ങൾ ഇറാന്റെ മിസൈൽ ഭീഷണിയിലാണ്. ഇറാഖിലുള്ള ഇന്ത്യൻ പൗരന്മാരോടും പ്രവാസികളോടും സുരക്ഷിത സ്ഥാനങ്ങളിൽ തുടരാൻ നിർദ്ദേശമുണ്ട്.
Summary: At least two fighters from the pro-Iran group Kataeb Hezbollah were killed and several wounded in a bombing targeting the Jurf al-Sakher military base in southern Iraq.
