ഓസ്ട്രേലിയൻ വനിതാ ക്രിക്കറ്റ് ടീം ക്യാപ്റ്റൻ അലീസ ഹീലി അന്താരാഷ്ട്ര ക്രിക്കറ്റിന്റെ എല്ലാ ഫോർമാറ്റുകളിൽ നിന്നും വിരമിച്ചു (Alyssa Healy Retirement). ഇന്ത്യക്കെതിരായ ഏക ടെസ്റ്റ് മത്സരത്തിൽ പത്ത് വിക്കറ്റ് വിജയം നേടിയതിന് പിന്നാലെയാണ് താരം വിടവാങ്ങൽ പ്രഖ്യാപിച്ചത്. പെർത്തിലെ വാക്ക ഗ്രൗണ്ടിൽ നടന്ന മത്സരത്തിലെ ജയത്തോടെ ഇന്ത്യക്കെതിരായ മൾട്ടി-ഫോർമാറ്റ് പരമ്പര 12-4 എന്ന നിലയിൽ ഓസ്ട്രേലിയ സ്വന്തമാക്കി. 16 വർഷം നീണ്ടുനിന്ന ഐതിഹാസിക കരിയറിനാണ് ഇതോടെ തിരശ്ശീല വീണത്.
വനിതാ ക്രിക്കറ്റിൽ ദൈർഘ്യമേറിയ ഫോർമാറ്റായ ടെസ്റ്റ് ക്രിക്കറ്റ് കൂടുതൽ വളരണമെന്നും ടെസ്റ്റ് ക്രിക്കറ്റ് നീണാൾ വാഴട്ടെയെന്നും തന്റെ വിടവാങ്ങൽ പ്രസംഗത്തിൽ ഹീലി പറഞ്ഞു. വൈറ്റ് ബോൾ ക്രിക്കറ്റിൽ ബാറ്റർമാർക്ക് ഇന്നിംഗ്സ് കെട്ടിപ്പടുക്കാൻ ലഭിക്കുന്ന അവസരങ്ങൾ പരിമിതമാണെന്നും യുവതാരങ്ങളുടെ വളർച്ചയ്ക്ക് ടെസ്റ്റ് ക്രിക്കറ്റ് അത്യന്താപേക്ഷിതമാണെന്നും 35-കാരിയായ ഹീലി ചൂണ്ടിക്കാട്ടി. പരിക്കുകളും ഫോമില്ലായ്മയും അലട്ടിയ ട്വന്റി-20 പരമ്പരയ്ക്ക് ശേഷം ടീം ശക്തമായി തിരിച്ചുവന്നതിൽ തനിക്ക് അഭിമാനമുണ്ടെന്നും താരം കൂട്ടിച്ചേർത്തു.
