15-കാരനായ യുവതാരം വൈഭവ് സൂര്യവംശിയുടെ പ്രതിഭ സച്ചിൻ ടെണ്ടുൽക്കറോടും വിരാട് കോലിയോടും തുല്യമാണെന്ന് ഇന്ത്യൻ ഇതിഹാസ താരം കപിൽ ദേവ്. അയർലൻഡ്, ഇംഗ്ലണ്ട് പര്യടനങ്ങൾക്കുള്ള ഇന്ത്യൻ ടി20 ടീമിൽ ഇടംപിടിച്ചെങ്കിലും ഇതുവരെ അരങ്ങേറ്റം കുറിക്കാൻ കഴിയാത്ത വൈഭവിനെക്കുറിച്ച് വലിയ പ്രതീക്ഷയാണ് കപിൽ ദേവ് പങ്കുവെക്കുന്നത് (Kapil Dev on Vaibhav Sooryavanshi). താരത്തിന്റെ പ്രായമല്ല, മറിച്ച് അദ്ദേഹത്തിന്റെ കഴിവിനെ അടിസ്ഥാനമാക്കിയായിരിക്കണം ടീമിലേക്കുള്ള തിരഞ്ഞെടുപ്പെന്ന് കപിൽ ദേവ് അഭിപ്രായപ്പെട്ടു.
ടി20 ഫോർമാറ്റിൽ വൈഭവ് മികച്ച പ്രകടനം പുറത്തെടുക്കുന്നുണ്ടെങ്കിലും ടെസ്റ്റ് ക്രിക്കറ്റിലെ അദ്ദേഹത്തിന്റെ ഭാവി കണ്ടറിയേണ്ടതുണ്ടെന്ന് കപിൽ ദേവ് പറഞ്ഞു. “ടി20യിൽ അവൻ അതിഗംഭീരമാണ്. എന്നാൽ ടെസ്റ്റ് ക്രിക്കറ്റിലേക്ക് വരുമ്പോൾ അഞ്ചോവറുകൾ മേയ്ഡൻ ആക്കി പന്തുകളെ പ്രതിരോധിക്കാൻ അവന് കഴിയുമോ എന്നതാണ് ചോദ്യം. ടെസ്റ്റിൽ അവൻ തന്റെ കഴിവ് തെളിയിക്കേണ്ടതുണ്ട്,” കപിൽ ഒരു പോഡ്കാസ്റ്റിൽ വ്യക്തമാക്കി.
വൈഭവിനെക്കുറിച്ച് വലിയ തോതിലുള്ള ചർച്ചകൾ നടക്കുന്നതിനിടയിലും, അദ്ദേഹത്തിന് വളരാൻ ആവശ്യമായ സമയം നൽകണമെന്നും അമിതമായ ഹൈപ്പ് നൽകി സമ്മർദ്ദത്തിലാക്കരുതെന്നും കപിൽ മുന്നറിയിപ്പ് നൽകി. സച്ചിൻ ടെണ്ടുൽക്കർ ചെറുപ്പത്തിൽ ടീമിലെത്തിയതിനെ ഉദാഹരിച്ച അദ്ദേഹം, ഒരാൾ തയ്യാറാണെന്ന് തോന്നിയാൽ പ്രായം കണക്കിലെടുക്കാതെ ടീമിൽ ഉൾപ്പെടുത്തണമെന്നും പറഞ്ഞു. കരിയറിൽ മോശം കാലഘട്ടങ്ങൾ വരാം, അതിൽ നിന്ന് എങ്ങനെ തിരിച്ചുവരുന്നു എന്നതാണ് ഒരു താരത്തിന്റെ യഥാർത്ഥ മികവെന്നും അദ്ദേഹം കൂട്ടിച്ചേർത്തു.
Summary: Legendary cricketer Kapil Dev has praised 15-year-old batting sensation Vaibhav Sooryavanshi, comparing his immense talent to that of Sachin Tendulkar and Virat Kohli. While acknowledging Sooryavanshi’s T20 prowess, Kapil stressed that his ability, not age, should dictate selection. However, he cautioned that the young star still needs to prove himself in the longer format, specifically questioning his ability to handle pressure in Test cricket, while also urging fans and the media not to overwhelm the teenager with excessive hype.
