ന്യൂഡൽഹി: അധ്യാപക നിയമനത്തിനും പ്രൊമോഷനും അധ്യാപക യോഗ്യതാ പരീക്ഷ (TET) നിർബന്ധമാക്കിയ സുപ്രീം കോടതി വിധിക്കെതിരായ പുനഃപരിശോധനാ ഹർജികൾ ചൊവ്വാഴ്ച കോടതി പരിഗണിക്കും (Supreme Court TET Mandatory Verdict Review). ജസ്റ്റിസ് ദീപാങ്കർ ദത്ത അധ്യക്ഷനായ ബെഞ്ചാണ് ചേംബറിൽ ഹർജികൾ പരിശോധിക്കുന്നത്. സംസ്ഥാന സർക്കാരും അധ്യാപക സംഘടനകളും ഉൾപ്പെടെ 45 കക്ഷികളാണ് വിധി പുനഃപരിശോധിക്കണമെന്ന് ആവശ്യപ്പെട്ട് കോടതിയെ സമീപിച്ചിരിക്കുന്നത്.
നെറ്റ് (NET), എം.ഫിൽ, പിഎച്ച്.ഡി തുടങ്ങിയ ഉയർന്ന യോഗ്യതകളുടെ അടിസ്ഥാനത്തിൽ ജോലിയിൽ പ്രവേശിച്ച അരലക്ഷത്തോളം അധ്യാപകരുടെ ജോലിയെയും സ്ഥാനക്കയറ്റത്തെയും പുതിയ വിധി ബാധിക്കും. ഇവർ വീണ്ടും ടെറ്റ് പരീക്ഷ പാസാകണമെന്ന നിബന്ധന ഒഴിവാക്കണമെന്നാണ് ഹർജിക്കാരുടെ ആവശ്യം. 2012 മാർച്ച് 31-ന് മുൻപ് സർവീസിൽ പ്രവേശിച്ച അധ്യാപകർക്ക് കെ-ടെറ്റ് (K-TET) നിർബന്ധമാക്കരുതെന്നും വിരമിക്കുന്നത് വരെ സർവീസിൽ തുടരാൻ അനുവദിക്കണമെന്നും സംസ്ഥാന സർക്കാർ ആവശ്യപ്പെടുന്നു.
കുട്ടികളുടെ ബോധന ശാസ്ത്രത്തിലും അധ്യാപന അഭിരുചിയിലും കേന്ദ്രീകരിക്കുന്ന പരീക്ഷയായതിനാൽ സ്കൂൾ അധ്യാപകരാകാൻ ടെറ്റ് നിർബന്ധമായും പാസാകണമെന്നായിരുന്നു സുപ്രീം കോടതിയുടെ മുൻ ഉത്തരവ്. തുറന്ന കോടതിയിൽ വാദം കേൾക്കണമെന്ന ആവശ്യം ഹർജിക്കാർ ഉന്നയിച്ചിട്ടുണ്ട്. ഉയർന്ന വിദ്യാഭ്യാസ യോഗ്യതയുള്ളവർക്ക് ടെറ്റ് പരീക്ഷാ നിബന്ധനയിൽ ഇളവ് ലഭിക്കുമോ അതോ വിധിയിൽ കോടതി ഉറച്ചുനിൽക്കുമോ എന്നത് അധ്യാപകർക്ക് ഏറെ നിർണ്ണായകമാകും.
Summary: The Supreme Court is set to hear 45 review petitions, including one from the Kerala state government, against the verdict making the Teacher Eligibility Test (TET) mandatory for appointments and promotions. The case, affecting nearly 50,000 teachers with high qualifications like PhD and NET, will be considered on Tuesday by a bench led by Justice Dipankar Datta. The government seeks exemption for teachers appointed before March 31, 2012.
