ന്യൂഡൽഹി : റാഞ്ചിയിലെ പ്ലസ് ടു വിദ്യാർത്ഥിയായ സാർത്ഥക് സിദ്ധാന്ത് വീണ്ടും വാർത്തകളിൽ നിറയുന്നു. സിബിഎസ്ഇ പരീക്ഷകളുടെ ഓൺ-സ്ക്രീൻ മൂല്യനിർണ്ണയ പ്രക്രിയയിലെ ക്രമക്കേടുകൾ പുറത്തുകൊണ്ടുവന്നതിന് പിന്നാലെ, സർക്കാർ ടെൻഡർ നടപടികളിൽ സുതാര്യത ഉറപ്പാക്കാനായി പുതിയൊരു വെബ്സൈറ്റുമായി ഈ പതിനെട്ടുകാരൻ രംഗത്തെത്തിയിരിക്കുകയാണ്.(Sarthak Sidhant launches public portal for government tender records)
ഗവൺമെന്റിന്റെ സെൻട്രൽ പബ്ലിക് പ്രൊക്യുർമെന്റ് പോർട്ടലിൽ (CPPP) നിന്ന് ശേഖരിച്ച ഏകദേശം 16.6 കോടി സർക്കാർ ടെൻഡർ രേഖകളാണ് സാർത്ഥക് തന്റെ വെബ്സൈറ്റായ sarthaksiddhant.com-ൽ ലഭ്യമാക്കിയിരിക്കുന്നത്. സർക്കാർ ചെലവഴിക്കുന്ന ഓരോ രൂപയും ടെൻഡർ നടപടികളിലൂടെയാണ് കടന്നുപോകുന്നത്. എന്നാൽ ഇതാണ് അഴിമതികൾക്ക് വഴിയൊരുക്കുന്ന പ്രധാന ഇടം എന്നും, അതുകൊണ്ട് തന്നെ ഈ വിവരങ്ങൾ ജനങ്ങൾക്ക് ലഭ്യമാകണമെന്നും സാർത്ഥക് പറയുന്നു.
തന്റെ എക്സ് അക്കൗണ്ടിലൂടെയാണ് സാർത്ഥക് ഈ പുതിയ സംരംഭത്തെക്കുറിച്ച് പ്രഖ്യാപിച്ചത്. സാധാരണക്കാർക്ക് ഉപയോഗിക്കാൻ പ്രയാസമുള്ള ഔദ്യോഗിക സർക്കാർ പോർട്ടലിൽ നിന്ന് വ്യത്യസ്തമായി, എല്ലാവർക്കും എളുപ്പത്തിൽ ഡൗൺലോഡ് ചെയ്യാനും വിശകലനം ചെയ്യാനും സാധിക്കുന്ന രീതിയിലാണ് ഈ സൈറ്റ് രൂപകൽപ്പന ചെയ്തിരിക്കുന്നത്. മാധ്യമപ്രവർത്തകരും ഗവേഷകരും വിവരങ്ങൾ പരിശോധിക്കണമെന്നും, ഇത് പൊതുഖജനാവിലെ ചെലവുകൾ നിരീക്ഷിക്കാൻ സഹായിക്കുമെന്നും അദ്ദേഹം അഭ്യർത്ഥിക്കുന്നു. ഇതിനായി എൻജിനീയർമാരുടെ ഒരു സംഘത്തെയും ഒരുക്കുന്നുണ്ട്.
നേരത്തെ, തന്റെ ഉത്തരക്കടലാസിലെ മാർക്കിൽ സംശയം തോന്നിയതിനെ തുടർന്നാണ് സാർത്ഥക് സിബിഎസ്ഇയുടെ ഓൺ-സ്ക്രീൻ മൂല്യനിർണ്ണയ സംവിധാനത്തെക്കുറിച്ച് അന്വേഷണം തുടങ്ങിയത്. തുടർന്ന് നടത്തിയ പഠനത്തിൽ ടെൻഡർ നടപടികളിൽ ഗുരുതരമായ ക്രമക്കേടുകൾ കണ്ടെത്തി. ഇക്കാര്യം പാർലമെന്ററി സ്റ്റാൻഡിംഗ് കമ്മിറ്റിക്ക് മുന്നിൽ അവതരിപ്പിക്കുകയും ചെയ്തിരുന്നു. വിദ്യാഭ്യാസ മേഖലയിലെ ഇടപെടലിന് ശേഷം, സർക്കാർ ടെൻഡറുകളിലെ സുതാര്യതയ്ക്കായി നടത്തുന്ന ഈ നീക്കം വൻ ശ്രദ്ധയാണ് നേടിയിരിക്കുന്നത്.
Story Summary
CBSE whistleblower Sarthak Sidhant, a Ranchi-based student, has launched a new public portal that simplifies access to over 16.6 crore government procurement records. By scraping data from the Central Public Procurement Portal, he aims to promote transparency and allow citizens, journalists, and researchers to independently scrutinize government spending.
