ന്യൂഡൽഹി: പ്രതിരോധം, സാങ്കേതികവിദ്യ, വാണിജ്യം തുടങ്ങിയ മേഖലകളിൽ സഹകരണം ശക്തമാക്കാൻ ഇന്ത്യയും ഫ്രാൻസും തീരുമാനിച്ചു. ഫ്രാൻസിലെ നീസിൽ പ്രധാനമന്ത്രി നരേന്ദ്ര മോദിയും പ്രസിഡന്റ് ഇമ്മാനുവൽ മക്രോണും തമ്മിൽ നടത്തിയ ഉഭയകക്ഷി ചർച്ചയിലാണ് സുപ്രധാന തീരുമാനങ്ങൾ കൈക്കൊണ്ടത്. ഇരുരാജ്യങ്ങളും തമ്മിലുള്ള ബന്ധം ‘പ്രത്യേക ആഗോള തന്ത്രപ്രധാന പങ്കാളിത്ത’ തലത്തിലേക്ക് ഉയർത്തിയതിന് ശേഷമുള്ള ആദ്യ കൂടിക്കാഴ്ചയാണിത്.(PM Modi Macron Strengthen India France Strategic Partnership)
പ്രതിരോധ സാങ്കേതികവിദ്യകളും പ്ലാറ്റ്ഫോമുകളും സംയുക്തമായി രൂപകൽപ്പന ചെയ്യാനും നിർമ്മിക്കാനും ഇരുനേതാക്കളും ധാരണയിലെത്തി. നിർമ്മിത ബുദ്ധി (AI) മേഖലയിൽ സഹകരണം ഉറപ്പാക്കാൻ ‘ഇന്നൊവേഷൻ റോഡ്മാപ്പ് 2030’ നടപ്പിലാക്കും. ബഹിരാകാശ ഗവേഷണം, മനുഷ്യ ബഹിരാകാശ യാത്ര, ആണവോർജ്ജ മേഖലയിലെ സഹകരണം എന്നിവ വർദ്ധിപ്പിക്കാനും തീരുമാനിച്ചു.
വരും അഞ്ച് വർഷത്തിനുള്ളിൽ ഉഭയകക്ഷി വ്യാപാരം ഇരട്ടിയാക്കാൻ ഉന്നതതല സംവിധാനം രൂപീകരിക്കും. ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാർ വേഗത്തിലാക്കാൻ ധാരണയായി. ഫ്രാൻസിലെ വിമാനത്താവളങ്ങളിൽ ഇന്ത്യൻ പൗരന്മാർക്കായി വിസ-ഫ്രീ ട്രാൻസിറ്റ് സൗകര്യം ഏർപ്പെടുത്തിയതിനെ പ്രധാനമന്ത്രി മോദി സ്വാഗതം ചെയ്തു. കൂടാതെ, വിദ്യാർത്ഥികൾക്കും വിദഗ്ധർക്കും ഇരുരാജ്യങ്ങൾക്കിടയിൽ സഞ്ചരിക്കാനും വിദ്യാഭ്യാസ യോഗ്യതകൾ പരസ്പരം അംഗീകരിക്കാനും തീരുമാനമായി.
റഷ്യ-യുക്രെയിൻ, പശ്ചിമേഷ്യൻ പ്രതിസന്ധികൾ ഉൾപ്പെടെയുള്ള ആഗോള വിഷയങ്ങളും നേതാക്കൾ ചർച്ച ചെയ്തു. രണ്ടു ദിവസത്തെ ഫ്രാൻസ് സന്ദർശനം പൂർത്തിയാക്കിയ പ്രധാനമന്ത്രി മോദി സ്ലൊവാക്യയിലേക്ക് യാത്ര തിരിച്ചു. സ്ലൊവാക്യയിലെ കൂടിക്കാഴ്ചകൾക്ക് ശേഷം ജൂൺ 16, 17 തീയതികളിൽ നടക്കുന്ന ജി7 ഉച്ചകോടിയിൽ മോദി പങ്കെടുക്കും.
Story Summary
Prime Minister Narendra Modi and French President Emmanuel Macron have agreed to strengthen bilateral cooperation in defense, technology, and trade during their meeting in Nice. The leaders focused on joint defense manufacturing, AI innovation, and increasing bilateral trade, while also discussing key global geopolitical issues. Following his successful visit to France, the Prime Minister has departed for Slovakia to continue his diplomatic tour and attend the upcoming G7 summit.
