ന്യൂഡൽഹി: പശ്ചിമേഷ്യയിലെ ആഭ്യന്തര സംഘർഷങ്ങളും ഹോർമുസ് കടലിടുക്കിലെ ഉപരോധവും കാരണം ആഗോളതലത്തിൽ ഇന്ധന വിതരണം തടസ്സപ്പെടുന്ന പശ്ചാത്തലത്തിൽ, രാജ്യത്ത് ബദൽ ഊർജ്ജ സ്രോതസ്സുകൾ അടിയന്തരമായി കണ്ടെത്താൻ നിർദ്ദേശിച്ച് പ്രധാനമന്ത്രി നരേന്ദ്ര മോദി. പാചക വാതകമായ എൽ.പി.ജിക്ക് പകരമായി ബയോഗ്യാസ് ഉൽപ്പാദനവും വിതരണവും വലിയ രീതിയിൽ വ്യാപിപ്പിക്കുന്നതിനുള്ള സാധ്യതകൾ തേടാൻ അദ്ദേഹം കേന്ദ്ര മന്ത്രിസഭാ യോഗത്തിൽ ആവശ്യപ്പെട്ടു.(PM Modi cabinet meeting, PM Modi Urges Ministers To Explore Biogas As LPG Substitute )
യു.എ.ഇയിലും നാല് യൂറോപ്യൻ രാജ്യങ്ങളിലും നടത്തിയ ഔദ്യോഗിക സന്ദർശനത്തിന് ശേഷം മടങ്ങിയെത്തിയ ഉടൻ പ്രധാനമന്ത്രിയുടെ അധ്യക്ഷതയിൽ ചേർന്ന മൂന്നര മണിക്കൂർ നീണ്ട കേന്ദ്ര മന്ത്രിമാരുടെ യോഗത്തിലാണ് ഈ നിർണായക തീരുമാനം. വിദേശരാജ്യങ്ങളിലെ ചർച്ചകളിൽ പശ്ചിമേഷ്യൻ സംഘർഷവും അതിന്റെ ആഗോള പ്രത്യാഘാതങ്ങളുമായിരുന്നു പ്രധാന ചർച്ചാവിഷയം. ‘വികസിത് ഭാരത് 2047’ എന്നത് വെറുമൊരു വാഗ്ദാനമല്ല, മറിച്ച് സർക്കാരിന്റെ പ്രതിബദ്ധതയാണെന്ന് വ്യക്തമാക്കിയ പ്രധാനമന്ത്രി, മുൻകാല നേട്ടങ്ങളിൽ തൃപ്തരായി ഇരിക്കാതെ ഭാവിയിലേക്ക് നോക്കി പരിഷ്കാരങ്ങൾ വേഗത്തിലാക്കാൻ മന്ത്രിമാരോട് ആവശ്യപ്പെട്ടു.
എല്ലാ ഭരണപരിഷ്കാരങ്ങളുടെയും ലക്ഷ്യം ജനങ്ങളുടെ ജീവിതം കൂടുതൽ സുഗമമാക്കുക എന്നതായിരിക്കണം. പുതിയ പദ്ധതികളോ പരിഷ്കാരങ്ങളോ ഒരിക്കലും സാധാരണ ജനങ്ങളെ ബുദ്ധിമുട്ടിക്കുന്നതോ പീഡിപ്പിക്കുന്നതോ ആകരുത്. യോഗത്തിൽ വിദേശകാര്യം, കൃഷി, പരിസ്ഥിതി, ഗതാഗതം, തൊഴിൽ, വാണിജ്യം, ഊർജ്ജം തുടങ്ങിയ പ്രമുഖ മന്ത്രാലയങ്ങൾ തങ്ങൾ നടപ്പിലാക്കിയ പരിഷ്കാരങ്ങളെക്കുറിച്ച് പ്രസന്റേഷൻ നടത്തി. വിവിധ വകുപ്പുകളുടെ ഫയൽ തീർപ്പാക്കൽ, ജനങ്ങളുടെ പരാതി പരിഹരിക്കൽ എന്നിവയിലെ പ്രകടനത്തിന്റെ അടിസ്ഥാനത്തിൽ മികച്ച പ്രകടനം കാഴ്ചവെച്ച ആദ്യ 5 മന്ത്രാലയങ്ങളെയും പിന്നിലായ 5 മന്ത്രാലയങ്ങളെയും യോഗത്തിൽ തരംതിരിച്ചു. ‘റിഫോം, പെർഫോം, ട്രാൻസ്ഫോം, ഇൻഫോം’ എന്ന തന്റെ ഭരണമന്ത്രം ഓർമ്മിപ്പിച്ച പ്രധാനമന്ത്രി, മൂന്നാം എൻ.ഡി.എ സർക്കാർ ജൂൺ 9-ന് രണ്ട് വർഷം പൂർത്തിയാക്കുന്ന പശ്ചാത്തലത്തിൽ കൂടുതൽ ഊർജ്ജസ്വലമായി മുന്നോട്ട് പോകാൻ ആഹ്വാനം ചെയ്തു.
Story Summary
Amid the West Asian energy crisis and the Strait of Hormuz blockade, Prime Minister Narendra Modi urged the Council of Ministers to find alternative energy sources like biogas to substitute LPG. Addressing a high-level meeting after his 5-nation tour, Modi emphasized that all reforms must prioritize the ‘ease of living’ for citizens towards achieving ‘Viksit Bharat 2047’.
