കാനഡയിൽ താമസിക്കുന്ന ഹിമാനി മിസ്ട്രി എന്ന യുവതിക്ക് ഇന്ത്യയിൽ നിന്ന് മാതാപിതാക്കൾ അയച്ച 20 കിലോ ഭാരമുള്ള പാഴ്സൽ സോഷ്യൽ മീഡിയയിൽ വൈറലാകുന്നു (Parents gift Emotional video). ഭക്ഷണ സാധനങ്ങളും സമ്മാനങ്ങളും നിറഞ്ഞ പാഴ്സലിനെ “സ്നേഹം നിറഞ്ഞ പൊതി” എന്നാണ് ഹിമാനി വിശേഷിപ്പിച്ചത്. പ്രവാസികളായ ഇന്ത്യക്കാർക്ക് മാത്രം മനസ്സിലാകുന്ന വൈകാരികമായ നിമിഷമാണിതെന്ന് ഇൻസ്റ്റാഗ്രാമിൽ പങ്കുവെച്ച വീഡിയോയിൽ അവർ പറയുന്നു.
മാതാപിതാക്കൾ ഏറെ സ്നേഹത്തോടെ പാക്ക് ചെയ്ത് അയച്ച പാഴ്സലിൽ ആമ്രസ് (മാമ്പഴരസം), തേപ്ല, വിവിധതരം വസ്ത്രങ്ങൾ, ആക്സസറികൾ എന്നിവയടങ്ങുന്ന വലിയൊരു ശേഖരമാണുള്ളത്. തനിക്കും ഭർത്താവിനും വേണ്ടിയുള്ള സമ്മാനങ്ങളും ഇതിൽ ഉൾപ്പെടുന്നു. ഓരോ സാധനവും തിരഞ്ഞെടുക്കാൻ മാതാപിതാക്കൾ കടകളിൽ കയറിയിറങ്ങിയതും, ഏറ്റവും നല്ല മാമ്പഴങ്ങൾ കൈകൊണ്ട് തിരഞ്ഞെടുത്തതും തനിക്ക് ഊഹിക്കാൻ കഴിയുന്നുണ്ടെന്ന് ഹിമാനി വികാരനിർഭരമായി കുറിച്ചു.
“ദൂരം നമ്മളെ കുടുംബത്തിൽ നിന്ന് അകറ്റിയേക്കാം, എന്നാൽ സ്നേഹം എപ്പോഴും അതിന്റെ വഴികണ്ടെത്തും. എത്ര പ്രായമായാലും എത്ര ദൂരെ പോയാലും മാതാപിതാക്കൾ നമ്മളെ കരുതുന്നത് ഒരിക്കലും അവസാനിപ്പിക്കില്ല,” ഹിമാനി ഇൻസ്റ്റാഗ്രാം പോസ്റ്റിൽ കുറിച്ചു. പാഴ്സലിലെ ഓരോ പാളിയും തുറക്കുമ്പോൾ അവരുടെ സ്നേഹവും കരുതലും തനിക്ക് അനുഭവിക്കാൻ കഴിഞ്ഞുവെന്നും അവർ കൂട്ടിച്ചേർത്തു. പ്രവാസജീവിതം നയിക്കുന്ന നിരവധി പേരാണ് ഈ വീഡിയോയ്ക്ക് താഴെ സമാനമായ അനുഭവങ്ങൾ പങ്കുവെച്ചുകൊണ്ട് കമന്റുകളുമായെത്തിയത്.
