ന്യൂഡൽഹി: വിദേശകാര്യ മന്ത്രി ഡോ. എസ്. ജയശങ്കറിന്റെ ത്രിദിന യുഎസ് സന്ദർശനത്തിന് തുടക്കമായി. വാഷിംഗ്ടണിലെത്തിയ അദ്ദേഹം യുഎസ് സ്റ്റേറ്റ് സെക്രട്ടറി മാർക്കോ റുബിയോയുമായി കൂടിക്കാഴ്ച നടത്തി. ഇരുരാജ്യങ്ങളും തമ്മിൽ ഒപ്പിട്ട പുതിയ വ്യാപാര കരാറിനെ നേതാക്കൾ സ്വാഗതം ചെയ്യുകയും ഉഭയകക്ഷി ബന്ധം കൂടുതൽ ഊർജ്ജിതമാക്കാൻ തീരുമാനിക്കുകയും ചെയ്തു.(New impetus in India-US trade relations, External Affairs Minister S Jaishankar in Washington)
പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡൊണാൾഡ് ട്രംപും തമ്മിൽ നടത്തിയ ടെലിഫോൺ ചർച്ചയെത്തുടർന്നാണ് തിങ്കളാഴ്ച ഈ ചരിത്രപരമായ വ്യാപാര കരാർ പ്രഖ്യാപിച്ചത്. കരാർ പ്രകാരം ചില ഇന്ത്യൻ ഉൽപ്പന്നങ്ങളുടെ ഇറക്കുമതി തീരുവ 25 ശതമാനത്തിൽ നിന്ന് 18 ശതമാനമായി കുറയ്ക്കാൻ യുഎസ് സമ്മതിച്ചു. ഇത് ഉടനടി പ്രാബല്യത്തിൽ വരും.
ഈ തീരുമാനം ഇന്ത്യയിലെ തൊഴിലവസരങ്ങൾ വർദ്ധിപ്പിക്കുമെന്നും ‘മേക്ക് ഇൻ ഇന്ത്യ’ പദ്ധതിക്ക് വലിയ കരുത്തേകുമെന്നും ജയശങ്കർ വ്യക്തമാക്കി. സാമ്പത്തിക വളർച്ച ത്വരിതപ്പെടുത്തുന്നതിനൊപ്പം നൂതനാശയങ്ങളെ പ്രോത്സാഹിപ്പിക്കാനും ഈ കരാർ സഹായിക്കും. സന്ദർശനത്തിന്റെ ഭാഗമായി യുഎസ് ട്രഷറി സെക്രട്ടറി സ്കോട്ട് ബെസ്സന്റുമായും ഡോ. എസ്. ജയശങ്കർ ചർച്ചകൾ നടത്തി. ഇന്ത്യ-യുഎസ് സാമ്പത്തിക സഹകരണമായിരുന്നു കൂടിക്കാഴ്ചയിലെ പ്രധാന അജണ്ട. കൂടാതെ, വാഷിംഗ്ടണിൽ ഇന്ന് നടക്കുന്ന അന്താരാഷ്ട്ര ക്രിട്ടിക്കൽ മിനറൽസ് ഉച്ചകോടിയിൽ ജയശങ്കർ പങ്കെടുക്കും. ഇന്ത്യയുൾപ്പെടെ 50 രാജ്യങ്ങളാണ് ഈ ഉന്നതതല ഉച്ചകോടിയിൽ ഭാഗമാകുന്നത്.
