ലാത്തൂർ: ദേശീയ മെഡിക്കൽ പ്രവേശന പരീക്ഷയായ നീറ്റ് ചോദ്യപ്പേപ്പർ ചോർച്ചക്കേസിൽ സി.ബി.ഐ അറസ്റ്റ് ചെയ്ത രേണുകായ് കെമിസ്ട്രി ക്ലാസസ് സ്ഥാപകൻ ശിവരാജ് രഘുനാഥ് മൊട്ടേഗാവ്കർ എന്ന ‘എം സാറിന്’ ലാത്തൂരിൽ എട്ടേക്കറിലധികം വരുന്ന വൻ സാമ്രാജ്യമെന്ന് റിപ്പോർട്ടുകൾ (NEET UG Paper Leak Accused Motegaonkar Arrest). പരീക്ഷാ അഴിമതിയിലൂടെ സമ്പാദിച്ച പണം ഉപയോഗിച്ച് ലാത്തൂരിന് സമീപമുള്ള ഖോപെഗാവ് ശിവർ മേഖലയിൽ വലിയൊരു സ്കൂളും കോളേജും നിർമ്മിക്കാനുള്ള ഒരുക്കത്തിലായിരുന്നു ഇയാളെന്ന് അന്വേഷണ സംഘം കണ്ടെത്തി. ഈ എട്ടേക്കർ ഭൂമിയിൽ രണ്ടര ഏക്കറിലായി പണിതുയർത്തിയ ബഹുനില മന്ദിരത്തിന്റെ നിർമ്മാണം അവസാന ഘട്ടത്തിലാണ്. കോടികൾ വിലമതിക്കുന്ന ഈ ഭൂമിയുടെയും കെട്ടിടത്തിന്റെയും സാമ്പത്തിക സ്രോതസ്സിനെക്കുറിച്ച് അന്വേഷണം ആരംഭിച്ചിട്ടുണ്ട്.
മെയ് 3-ന് നടന്ന നീറ്റ് പരീക്ഷയുടെ ചോദ്യപ്പേപ്പറും ഉത്തരങ്ങളും പരീക്ഷയ്ക്ക് പത്ത് ദിവസം മുൻപ്, അതായത് ഏപ്രിൽ 23-ന് തന്നെ മൊട്ടേഗാവ്കറുടെ മൊബൈൽ ഫോണിൽ ലഭിച്ചിരുന്നുവെന്ന് സി.ബി.ഐ വ്യക്തമാക്കി. ചോദ്യപ്പേപ്പർ ചോർത്തുന്ന മാഫിയ സംഘത്തിലെ സജീവ അംഗമാണ് ഇയാൾ. നാഷണൽ ടെസ്റ്റിംഗ് ഏജൻസിയുമായി ബന്ധമുള്ള കെമിസ്ട്രി ലക്ചറർ പി.വി. കുൽക്കർണിയുമായി ഇയാൾക്ക് അടുത്ത ബന്ധമുണ്ട്. മൊട്ടേഗാവ്കറുടെ സ്ഥാപനത്തിലും വീട്ടിലും നടത്തിയ തിരച്ചിലിൽ കണ്ടെത്തിയ കെമിസ്ട്രി ക്വസ്റ്റ്യൻ ബാങ്കിലെ ചോദ്യങ്ങൾ തന്നെയാണ് നീറ്റ് പരീക്ഷയിലും വന്നതെന്ന് സി.ബി.ഐ വക്താവ് സ്ഥിരീകരിച്ചു. ഡൽഹി, ജയ്പൂർ, നാസിക്, പൂനെ, ലാത്തൂർ തുടങ്ങിയ നഗരങ്ങളിൽ നിന്നായി ഈ പരീക്ഷാ തട്ടിപ്പ് കേസിൽ ഇതുവരെ പത്തോളം പേരെയാണ് സി.ബി.ഐ അറസ്റ്റ് ചെയ്തത്.
Summary: Shivraj Raghunath Motegaonkar, the founder of Renukai Chemistry Classes (RCC) who was arrested by the CBI in the NEET UG paper leak case, was reportedly constructing a massive school and college complex across an eight-acre plot near Latur, Maharashtra. Investigative agencies are now probing his source of funding after finding a multi-story building almost nearing completion on the site.
