ന്യൂഡൽഹി: ദേശീയ മെഡിക്കൽ പ്രവേശന പരീക്ഷയായ നീറ്റിന്റെ (NEET) ചോദ്യപേപ്പർ ചോർത്തിയ കേസിലെ മുഖ്യസൂത്രധാരൻ സിബിഐ (CBI) പിടിയിലായി (NEET Paper Leak Case Mastermind). മഹാരാഷ്ട്രയിലെ ലാത്തൂർ സ്വദേശിയും പ്രമുഖ അധ്യാപകനുമായ പി.വി. കുൽക്കർണിയെയാണ് പൂനെയിൽ വെച്ച് സിബിഐ പ്രത്യേക സംഘം അറസ്റ്റ് ചെയ്തത്. രാജ്യവ്യാപകമായി സിബിഐ നടത്തിയ റെയ്ഡുകൾക്കൊടുവിലാണ് കുൽക്കർണിയെക്കുറിച്ചുള്ള നിർണ്ണായക വിവരങ്ങൾ ലഭിക്കുന്നത്. ചോദ്യപേപ്പർ ചോർത്തി പുറത്തെത്തിച്ചതിൽ ഇയാൾക്ക് വലിയ പങ്കുണ്ടെന്ന് സിബിഐ സ്ഥിരീകരിച്ചു.
കഴിഞ്ഞ ഏപ്രിൽ അവസാനവാരം പൂനെയിലെ തന്റെ വസതിയിൽ വെച്ച് കുൽക്കർണി തിരഞ്ഞെടുത്ത ചില വിദ്യാർത്ഥികൾക്കായി പ്രത്യേക കോച്ചിംഗ് ക്ലാസുകൾ നടത്തിയിരുന്നു. ഈ ക്ലാസുകളിൽ വെച്ചാണ് പരീക്ഷയ്ക്ക് വരാനിരിക്കുന്ന ചോദ്യങ്ങളും അവയുടെ ശരിയായ ഉത്തരങ്ങളും ഓപ്ഷനുകളുമടക്കം ഇയാൾ വിദ്യാർത്ഥികൾക്ക് പറഞ്ഞു കൊടുത്തത്. കേസിലെ മറ്റൊരു പ്രതിയായ മനീഷ വാഗ്മരെയുടെ സഹായവും ഇയാൾക്ക് ലഭിച്ചിരുന്നു.
ചോദ്യപേപ്പർ ചോർച്ച പൂർണ്ണമായും സ്ഥിരീകരിച്ചതിനെ തുടർന്ന് കഴിഞ്ഞ മെയ് 3-ന് നടന്ന നീറ്റ് പരീക്ഷ നാഷണൽ ടെസ്റ്റിംഗ് ഏജൻസി റദ്ദാക്കിയിരുന്നു. വൻ സുരക്ഷാ ക്രമീകരണങ്ങളോടെ ജൂൺ 21-നാണ് പുതുക്കിയ പരീക്ഷ നടക്കുക. കേസുമായി ബന്ധപ്പെട്ട് കൂടുതൽ ആളുകളിലേക്ക് അന്വേഷണം വ്യാപിപ്പിക്കുമെന്നും ചോദ്യപേപ്പർ ലഭിച്ച വിദ്യാർത്ഥികളെയും ഇടനിലക്കാരെയും വരും ദിവസങ്ങളിൽ ചോദ്യം ചെയ്യുമെന്നും സിബിഐ വൃത്തങ്ങൾ അറിയിച്ചു.
News Summary: The Central Bureau of Investigation (CBI) has arrested P.V. Kulkarni, a teacher from Latur and the alleged mastermind behind the NEET question paper leak case, from Pune. Following nationwide raids, the CBI gathered concrete evidence proving Kulkarni’s pivotal role in leaking the exam papers. Investigations revealed that in late April, Kulkarni, with the assistance of co-accused Manisha Waghmare, conducted special coaching classes at his Pune residence where he provided students with exact exam questions and their correct answers. Following the confirmation of the leak, the exam held on May 3 was cancelled, and the re-examination has been scheduled for June 21.
