മുംബൈ: ഇന്ത്യയിലെ ആദ്യ സൂപ്പർഹീറോയായ ‘ശക്തിമാനെ’ ബിഗ് സ്ക്രീനിൽ എത്തിക്കുമ്പോൾ രൺവീർ സിംഗിനെ നായകനാക്കുന്നതിനോട് തനിക്ക് യോജിക്കാനാവില്ലെന്ന് മുകേഷ് ഖന്ന ആവർത്തിച്ചു (Shaktimaan Movie News). ഒരു ദേശീയ മാധ്യമത്തിന് നൽകിയ അഭിമുഖത്തിലാണ് അദ്ദേഹം തന്റെ നിലപാടുകൾ തുറന്നുപറഞ്ഞത്.
ശക്തിമാൻ വെറുമൊരു സൂപ്പർഹീറോ മാത്രമല്ല, ഒരു തലമുറയെ വഴിനടത്തിയ ‘സൂപ്പർ ടീച്ചർ’ കൂടിയാണ്. നിലവിൽ ഒരു പ്രത്യേക ഇമേജുള്ള നടൻ ഈ വേഷം ചെയ്യുന്നത് കഥാപാത്രത്തിന്റെ പരിശുദ്ധി നശിപ്പിക്കുമെന്ന് അദ്ദേഹം വിശ്വസിക്കുന്നു. ‘പൃഥ്വിരാജ് ചൗഹാൻ’ എന്ന ചിത്രത്തിൽ അക്ഷയ് കുമാറിന് ആ കഥാപാത്രത്തിന്റെ ഗാംഭീര്യം കൊണ്ടുവരാൻ കഴിഞ്ഞില്ലെന്നും വെറും വിഗ് വെച്ചതുകൊണ്ട് ഒരാൾ ചരിത്ര കഥാപാത്രമാകില്ലെന്നും അദ്ദേഹം ചൂണ്ടിക്കാട്ടി.
സോണി പിക്ചേഴ്സ് സിനിമയുമായി മുന്നോട്ട് പോകാൻ വലിയ തുക വാഗ്ദാനം ചെയ്യുന്നുണ്ടെങ്കിലും താൻ വഴങ്ങുന്നില്ല. ഈ വാശി കാരണം വ്യക്തിപരമായി കോടിക്കണക്കിന് രൂപയുടെ നഷ്ടമാണ് തനിക്ക് സംഭവിക്കുന്നതെന്ന് മുകേഷ് ഖന്ന വെളിപ്പെടുത്തി.രാജ്യവ്യാപകമായി ഓഡിഷൻ നടത്തി, ശാന്തവും ദയാലുവുമായ മുഖമുള്ള ഒരു പുതുമുഖത്തെ ശക്തിമാനായി കണ്ടെത്തണമെന്നാണ് അദ്ദേഹത്തിന്റെ ആഗ്രഹം.
ബേസിൽ ജോസഫ് ചിത്രം അനിശ്ചിതത്വത്തിൽ?
സോണി പിക്ചേഴ്സും സാജിദ് നദിയാദ്വാലയും ചേർന്ന് നിർമ്മിക്കുന്ന ചിത്രം മലയാളിയായ ബേസിൽ ജോസഫ് സംവിധാനം ചെയ്യുമെന്നായിരുന്നു റിപ്പോർട്ടുകൾ. എന്നാൽ ശക്തിമാൻ എന്ന കഥാപാത്രത്തിന്റെ ക്രിയേറ്റീവ് അവകാശങ്ങൾ മുകേഷ് ഖന്നയുടെ പക്കലായതിനാൽ അദ്ദേഹത്തിന്റെ പച്ചക്കൊടിയില്ലാതെ സിനിമയുമായി മുന്നോട്ട് പോകാൻ അണിയറപ്രവർത്തകർക്ക് കഴിയില്ല.
സൂപ്പർതാരങ്ങൾ വന്നതുകൊണ്ട് മാത്രം സിനിമ ഓടില്ലെന്നും നല്ല ഉള്ളടക്കമാണ് വിജയത്തിന്റെ അടിസ്ഥാനമെന്നും മുകേഷ് ഖന്ന ഓർമ്മിപ്പിച്ചു. തന്റെ നിലപാടിൽ മാറ്റമില്ലെന്നും അനുയോജ്യനായ ഒരാളെ കണ്ടെത്തുന്നത് വരെ സിനിമ നീണ്ടുപോകുമെന്നും അദ്ദേഹം സൂചിപ്പിച്ചു.
Story Summary: Actor Mukesh Khanna has reiterated his opposition to casting Ranveer Singh as Shaktimaan. In a recent interview, he stated that Shaktimaan needs an actor with a clean image and the personality of a ‘super teacher’, rather than a superstar. He emphasized that he is willing to lose crores of rupees rather than compromise on the character’s integrity. The project, rumored to be directed by Basil Joseph, remains in limbo due to Khanna’s firm stance.
